തൃശ്ശൂർ: മുണ്ടത്തിക്കോട് വെടിക്കെട്ട് പുരയിലുണ്ടായ ഉഗ്രസ്ഫോടനത്തിൽ കൊല്ലപ്പെട്ടവരുടെ മൃതദേഹങ്ങൾ തിരിച്ചറിയാനുള്ള നടപടികൾ ഊർജ്ജിതമാക്കി. തിരിച്ചറിയാനാകാത്ത നിലയിലുള്ള ശരീരഭാഗങ്ങൾ ഡിഎൻഎ പരിശോധനയ്ക്ക് വിധേയമാക്കുന്നതിനായി തിരുവനന്തപുരം രാജീവ് ഗാന്ധി ബയോ ടെക്നോളജിയിൽ നിന്നുള്ള വിദഗ്ധ സംഘം തൃശ്ശൂരിലെത്തി. നിലവിൽ 5 മൃതദേഹങ്ങളുടെയും 11 ശരീരഭാഗങ്ങളുടെയും പോസ്റ്റ്മോർട്ടം നടപടികൾ പൂർത്തിയായതായി റവന്യൂ മന്ത്രി കെ. രാജൻ അറിയിച്ചു.
അപകടത്തിൽപ്പെട്ടവർക്കുള്ള അടിയന്തര ധനസഹായം സംബന്ധിച്ച് ഇന്നത്തെ മന്ത്രിസഭാ യോഗം തീരുമാനമെടുക്കും. തൃശ്ശൂർ മെഡിക്കൽ കോളേജ് കേന്ദ്രീകരിച്ച് കോട്ടയം, കോഴിക്കോട്, പാലക്കാട്, എറണാകുളം എന്നിവിടങ്ങളിൽ നിന്നുള്ള മെഡിക്കൽ സംഘം സേവനമനുഷ്ഠിക്കുന്നുണ്ട്. പ്രവർത്തനങ്ങൾ ഏകോപിപ്പിക്കാൻ നാല് സ്ഥലങ്ങളിൽ പ്രത്യേക കൺട്രോൾ റൂമുകളും തുറന്നിട്ടുണ്ട്.
വെടിക്കെട്ട് അപകടത്തിൽ പരിക്കേറ്റ് ചികിത്സയിലുള്ള 13 പേരിൽ 10 പേർ തീവ്രപരിചരണ വിഭാഗത്തിലാണ്. വെടിക്കെട്ട് ലൈസൻസിയായ സതീശന്റെ നില അതീവ ഗുരുതരമായി തുടരുകയാണ്. ഇദ്ദേഹത്തെ കൂടാതെ പ്രവീൺ എന്നയാളും വെന്റിലേറ്ററിലാണ്. പരിക്കേറ്റ മറ്റൊരാളെ അടിയന്തര ശസ്ത്രക്രിയയ്ക്ക് വിധേയമാക്കും.
തൃശ്ശൂർ പൂരത്തിനായുള്ള വെടിക്കെട്ട് സാമഗ്രികൾ നിർമ്മിക്കുന്നതിനിടെ ഇന്നലെയുണ്ടായ അപകടത്തിൽ 13 പേർക്കാണ് ജീവൻ നഷ്ടമായത്. മരിച്ചവരിൽ ആറുപേരെ മാത്രമാണ് ഇതുവരെ തിരിച്ചറിയാൻ സാധിച്ചത്. ബാക്കിയുള്ളവരെ തിരിച്ചറിയുന്നതിനായി 15 ശരീരഭാഗങ്ങൾ കൂടി ഇനിയും പോസ്റ്റ്മോർട്ടം ചെയ്യാനുണ്ട്. ഡിഎൻഎ പരിശോധനാ ഫലം ലഭിക്കുന്നതോടെ മാത്രമേ തിരിച്ചറിയൽ പ്രക്രിയ പൂർത്തിയാകൂ.