റിലയൻസ്-ഡിസ്നി സംയുക്ത സംരംഭത്തെ കൂടുതൽ ശക്തമാക്കിക്കൊണ്ട് വാൾട്ട് ഡിസ്നിയുടെ സ്റ്റാർ ഗ്രൂപ്പ് നേരിട്ടുള്ള വിദേശ നിക്ഷേപം വഴി 123 കോടി രൂപ ജിയോസ്റ്റാർ ഇന്ത്യയിൽ നിക്ഷേപിച്ചു. നടപ്പ് സാമ്പത്തിക വർഷത്തിൽ ഡിസ്നി ഇതിനകം നടത്തിയ 3,847 കോടി രൂപയുടെ വൻ നിക്ഷേപങ്ങൾക്ക് പിന്നാലെയാണ് ഈ പുതിയ നടപടി. ഈ സംയുക്ത സംരംഭത്തിൽ നിന്ന് നിലവിൽ ഓഹരി നഷ്ടം നേരിടുന്നുണ്ടെങ്കിലും, ഡിസ്നി തുടർച്ചയായി നടത്തുന്ന ഈ സാമ്പത്തിക നിക്ഷേപം ഇന്ത്യൻ മാധ്യമ രംഗത്തുള്ള അവരുടെ തന്ത്രപരമായ താല്പര്യത്തെയാണ് വ്യക്തമാക്കുന്നത്. ഈ സാമ്പത്തിക പാദത്തിൽ രാജ്യത്തെ വിവര-പ്രക്ഷേപണ മേഖലയിൽ വലിയ തോതിലുള്ള വിദേശ നിക്ഷേപമാണ് കണ്ടത്.
ഇന്ത്യയിലെ വിനോദ, മാധ്യമ രംഗത്തെ ഏറ്റവും വലിയ പ്രക്ഷേപണ ശൃംഖലകളിൽ ഒന്നാണ് വാൾട്ട് ഡിസ്നിയുടെ ഭാഗമായ സ്റ്റാർ ഇന്ത്യ. കാലങ്ങളായി ഇന്ത്യൻ ടെലിവിഷൻ വിപണി ഭരിച്ചിരുന്ന സ്റ്റാർ ഇന്ത്യ ഗ്രൂപ്പിനെ, 2019-ൽ ട്വന്റി ഫസ്റ്റ് സെഞ്ചുറി ഫോക്സ് ഏറ്റെടുത്തത് വഴി വാൾട്ട് ഡിസ്നി കമ്പനി സ്വന്തമാക്കുകയായിരുന്നു. തുടർന്ന് ഇന്ത്യൻ മാധ്യമ ചരിത്രത്തിലെ ഏറ്റവും വലിയ ലയനത്തിലൂടെ ഡിസ്നിയുടെ സ്റ്റാർ ഇന്ത്യയും റിലയൻസിന്റെ വയാകോം 18-ഉം ചേർന്ന് ‘ജിയോസ്റ്റാർ ഇന്ത്യ’ എന്ന സംയുക്ത സംരംഭത്തിന് രൂപം നൽകി. ഈ വൻ ലയനത്തോടെ ഇന്ത്യയിലെ സിനിമ, വിനോദം, സ്പോർട്സ് മേഖലകളിലെ ഏറ്റവും വലിയ മാധ്യമ ശക്തിയായി ഈ ഗ്രൂപ്പ് മാറി.