മേപ്പാടി: വയനാട് കള്ളാടി മേഖല കടുത്ത ആശങ്കയിലും ഭീതിയിലുമഴ്ത്തി വൻ മണ്ണിടിച്ചിൽ. കനത്ത മഴയെ തുടർന്ന് മേപ്പാടി – ചൂരൽമല റോഡിൽ, കള്ളാടി തുരങ്കപാതയ്ക്ക് സമീപമാണ് അപകടമുണ്ടായത്. തുരങ്കപാത വയനാട്ടിൽ വന്നുചേരുന്ന സ്ഥലത്ത് പൈലിങ് ജോലികൾ നടക്കുന്നതിനിടെ മലയുടെ ഒരു വലിയ ഭാഗം പെട്ടെന്ന് പൊട്ടി താഴേക്ക് ഇടിഞ്ഞുവീഴുകയായിരുന്നു.
ദുരന്തത്തിന് കാരണം പ്രകൃതിക്ഷോഭം മാത്രമല്ലെന്നും, ശാസ്ത്രീയമല്ലാത്ത നിർമ്മാണ പ്രവർത്തനങ്ങൾ മൂലമുണ്ടായ ‘മനുഷ്യനിർമ്മിത’ അപകടമാണിതെന്നുമാണ് നാട്ടുകാരിൽ നിന്നും വ്യാപകമായ ആക്ഷേപം ഉയരുന്നത്.
ആളുകൾ തടിച്ചുകൂടുന്ന ഇടം; ജെ.സി.ബി അടക്കം മണ്ണിനടിയിൽ
അപകടം നടക്കുമ്പോൾ പൈലിങ് സൈറ്റിൽ 35-ഓളം തൊഴിലാളികൾ ഉണ്ടായിരുന്നുവെന്നാണ് ദൃക്സാക്ഷികൾ നൽകുന്ന വിവരം. ചെറിയ പെട്ടിക്കടകളും ബസ് സ്റ്റോപ്പുമൊക്കെയുള്ള, സാധാരണയായി ആളുകൾ ഏറെയധികം വന്നുനിൽക്കുന്ന തിരക്കേറിയ മേഖലയാണിത്. അതുകൊണ്ട് തന്നെ ദുരന്തത്തിന്റെ വ്യാപ്തി വർദ്ധിക്കുമെന്ന ആശങ്ക ശക്തമാണ്. തൊഴിലാളികളെ കൊണ്ടുവന്ന ബസ്, നിർമ്മാണത്തിനുപയോഗിച്ചിരുന്ന ജെ.സി.ബി (JCB) എന്നിവയുൾപ്പെടെ പൂർണ്ണമായും മണ്ണടിയിൽ പെട്ടുപോയിട്ടുണ്ടാകാമെന്ന് പ്രദേശവാസികൾ പറയുന്നു.
രക്ഷാപ്രവർത്തനം യുദ്ധകാലാടിസ്ഥാനത്തിൽ
അപകടം നടന്നയുടനെ നാട്ടുകാരും സന്നദ്ധപ്രവർത്തകരും ചേർന്ന് നടത്തിയ ആദ്യഘട്ട തിരച്ചിലിൽ പരുക്കേറ്റ 9 പേരെ രക്ഷപ്പെടുത്തി ആശുപത്രിയിലേക്ക് മാറ്റിയിട്ടുണ്ട്. നിലവിൽ സംഭവസ്ഥലത്ത് മണ്ണുമാന്തി യന്ത്രങ്ങൾ (JCB) എത്തിച്ച് കനത്ത മണ്ണ് നീക്കം ചെയ്യാനുള്ള ശ്രമങ്ങൾ യുദ്ധകാലാടിസ്ഥാനത്തിൽ പുരോഗമിക്കുകയാണ്.
തുടർച്ചയായ കനത്ത മഴയും ദുരന്തമേഖലയിൽ വീണ്ടും മണ്ണിടിയാനുള്ള സാധ്യതയും രക്ഷാപ്രവർത്തനത്തിന് കടുത്ത വെല്ലുവിളി ഉയർത്തുന്നുണ്ട്. കൂടുതൽ ദുരന്തനിവാരണ സേനാംഗങ്ങൾ സ്ഥലത്തേക്ക് തിരിച്ചിട്ടുണ്ട്.
കള്ളാടിയിലെ സ്ഥിതി വിലയിരുത്തി മുഖ്യമന്ത്രി വി.ഡി.സതീശന്. എന്ഡിആര്എഫിന്റെ കൂടുതല് സംഘം സ്ഥലത്തേക്ക് തിരിച്ചു. മന്ത്രിമാരായ ടി.സിദ്ദിഖും എ.പി.അനില്കുമാറും വയനാട്ടിലേക്ക് തിരിച്ചു.