ചെന്നൈ: മദ്രാസ് ഐഐടി വിദ്യാര്ത്ഥിനി ഫാത്തിമയുടെ മരണവുമായി ബന്ധപ്പെട്ട് നിര്ണായക തെളിവുകളുമായി കുടുംബം. ഫാത്തിമയുടെ പിതാവിന്റേയും ബന്ധുക്കളുടേയും കൈവശമാണ് നിര്ണായക തെളിവുകളുള്ളത്. ഈ തെളിവുകള് കുടുംബം ക്രൈംബ്രാഞ്ചിന് കൈമാറി.
ഫാത്തിമ നൈലോണ് കയറില് തൂങ്ങി മരിച്ചതായാണ് എഫ്ഐആറില് പൊലീസ് വ്യക്തമാക്കുന്നത്. എന്നാല് പെണ്കുട്ടിയുടെ മൃതദേഹം ആദ്യം കണ്ട സഹപാഠി, ഫാത്തിമയുടെ പിതാവിന് വാട്സ്ആപ്പ് വോയിസ് മെസേജ് അയച്ചിരുന്നു. ഇതില് മുട്ടുകുത്തിയ നിലയില് തൂങ്ങി നില്ക്കുകയാണ് എന്നാണ് വ്യക്തമാക്കുന്നത്. എഫ്ഐആര് ദുരൂഹമാണെന്ന് ബന്ധുക്കള് ആരോപിക്കുന്നു.
ഫാത്തിമയുടെ പിതാവ് ലത്തീഫില് നിന്നും ബന്ധുക്കളില് നിന്നും ക്രൈംബ്രാഞ്ച് മൊഴിയെടുത്തു. അഡീഷണല് കമ്മീഷ്ണര് ഈശ്വരമൂര്ത്തിയുടെ നേതൃത്വത്തിലുള്ള ഉദ്യോഗസ്ഥരാണ് മൊഴി രേഖപ്പെടുത്തിയത്. പിതാവില് നിന്നും ക്രൈംബ്രാഞ്ച് മൊഴി എടുക്കുന്നത് പൂര്ത്തിയായി.തുടര്ന്ന് ഐ.ഐ.ടി അധ്യാപകനെ ഉടന് ചോദ്യം ചെയ്യും.