തിരുവനന്തപുരം: ഏഷ്യാനെറ്റ് ന്യൂസ് നല്കിയ വ്യാജവാര്ത്തക്കെതിരെ പൊട്ടിത്തെറിച്ച് നടന് ഗോകുല് സുരേഷ്. വര്ഗീയ ലഹളകള് സൃഷ്ടിക്കാന് കെല്പ്പുള്ള തികച്ചും തെറ്റിദ്ധാരണ പരത്തുന്ന മ്ലേച്ഛകരമായ മാധ്യമ പ്രവര്ത്തനമാണ് ഏഷ്യാനെറ്റ് ന്യൂസ് നടത്തുന്നത്. നിങ്ങള് സ്വന്തം ധര്മത്തെ കളങ്കപെടുത്തുകയും ചതിക്കുകയുമാണ് ചെയ്യുന്നത്. നിങ്ങള്ക്ക് തോന്നും വിധം ആവിഷ്കരണം ചെയ്യാന് കഴിയുന്നതല്ല എന്റെ ആശയങ്ങളെന്ന് ഗോകുല് സുരേഷ് പറഞ്ഞു.
എന്റെ ഇന്സ്റ്റാഗ്രാം സ്റ്റോറിയില് ഞാന് കുറിച്ചതിന്റെ കാതല്. ഹിന്ദുക്കളില് നിന്നോ അമ്ബലങ്ങളില് നിന്നോ മാത്രമല്ല ഏത് മതത്തിന്റെയും ആരാധനാലയങ്ങളില് നിന്നും പൈസ ആവശ്യപ്പെടുന്നത് നന്നല്ല എന്നാണ് ഞാന് കുറിച്ചത്. ഇതിന്റെ പേരില് എനിക്കെതിരെ വന്ന കമെന്റുകളില് (ഭൂരിഭാഗവും വ്യാജ പ്രൊഫൈലുകള്) നിന്ന് തന്നെ മനസിലാകും പലര്ക്കും പദാവലിയില് വല്യ ഗ്രാഹ്യമില്ലെന്ന്.
പലരും ചിലയിടങ്ങളില് എന്റെ അച്ഛന് വര്ഗീയവാദിയാണെന്ന് ആരോപിക്കുന്നു മറ്റ് ചിലയിടങ്ങളില് വര്ഗീയവാദിയല്ലെന്ന് പറയുന്നു. എവിടുന്നാണ് ഇത്തരം കാര്യങ്ങള് പ്രചരിക്കപ്പെടുന്നത്? എന്താണ് ഇതിന്റെയൊക്കെ ഉദ്ദേശവും ലക്ഷ്യവുമെന്നും ഗോകുല് സുരേഷ് ഫേസ്ബുക്ക് പോസ്റ്റിലൂടെ ചോദിച്ചു.
”കാര്യങ്ങള് വ്യക്തമാക്കാന് ഞാന് കഴിയും വിധം ഏഷ്യാനെറ്റ് ന്യൂസിന്റെ പോര്ട്ടലില് വ്യക്തിപരമായി പലര്ക്കും കമെന്റിന് റിപ്ലൈ കൊടുത്തിരുന്നു. എന്നാല് ഏഷ്യാനെറ്റിന്റെ ഭാഗത്ത് നിന്ന് അവ ഡിലീറ്റ് ചെയ്യുന്നത് തികച്ചും നാണംകെട്ട പരിപാടിയാണ്. ഇതൊക്കെ കണ്ട് അവര് ആസ്വദിക്കുന്നു എന്നൊരു തോന്നല്. ആരുടെയെങ്കിലും മതപരമായ ആശയങ്ങളെ ഞാന് വാക്കുകളിലൂടെ വേദനിപ്പിച്ചുവെങ്കില് ക്ഷമ ചോദിക്കുന്നു. നിങ്ങള് മാധ്യമങ്ങളിലൂടെ വായിച്ചതും അറിഞ്ഞതും തെറ്റും അടിസ്ഥാനരഹിതവും എന്റെ അറിവോടെ സംഭവിച്ച കാര്യങ്ങളുമല്ല. ഈ കാലത്ത് മാധ്യമങ്ങള് അങ്ങേയറ്റം കാപട്യം നിറഞ്ഞതും വിശ്വാസയോഗ്യമല്ലാത്തവയുമായി മാറിയെന്നും വളരെ വിഷമത്തോടെ തന്നെ മനസിലാക്കുന്നു!