മന്ത്രി കെ ടി ജലീലിന്റെ രാജി ആവശ്യപ്പെട്ട് തുടര്ച്ചയായ നാലാം ദിവസവും സംസ്ഥാനത്ത് വ്യാപക പ്രതിഷേധം. യുവജന സംഘടകള് നടത്തിയ മാര്ച്ച് പലയിടത്തും അക്രമാസക്തമായി. തിരുവനന്തപുരത്ത് സെക്രട്ടേറിയറ്റിലേക്ക് യൂത്ത് കോണ്ഗ്രസ് നടത്തിയ മാര്ച്ചിന് നേരെ പൊലീസ് ഗ്രനേഡും കണ്ണീര്വാതകവും പ്രയോഗിച്ചു. സെക്രട്ടേറിയറ്റിന് മുന്നില് പൊലീസും പ്രവര്ത്തകരും ഏറ്റുമുട്ടി. പ്രവര്ത്തകര് പിരിഞ്ഞുപോകാതെ വന്നതോടെ പൊലീസ് ഗ്രനേഡും കണ്ണീര് വാതകവും പ്രയോഗിച്ചു. സംഘര്ഷം രൂക്ഷമായതോടെ പൊലീസ് ലാത്തി വീശി. കെ.എസ്.ശബരീനാഥന് എംഎല്എ അടക്കം നിരവധി പ്രവര്ത്തകര്ക്ക് പരുക്കേറ്റു.
സെക്രട്ടറിയേറ്റിലേക്ക് യുവമോര്ച്ച പ്രവര്ത്തകരും എസ്ഡിപിഐ പ്രവര്ത്തകരും നടത്തിയ മാര്ച്ചിലും സംഘര്ഷമുണ്ടായി. എസ്ഡിപിഐ പ്രവര്ത്തകര് ജലീലിന്റെ കോലം കത്തിച്ചു. യുവമോര്ച്ച പാലക്കാട് കളക്ടറേറ്റിലേക്ക് നടത്തിയ മാര്ച്ചും അക്രമാസക്തമായി. ബലപ്രയോഗത്തിലൂടെയാണ് നേതാക്കളെ പൊലീസ് നീക്കിയത്. നിരവധി പ്രവര്ത്തകര്ക്ക് പരുക്ക് പറ്റി. യുവമോര്ച്ച പ്രവര്ത്തകര് റോഡ് ഉപരോധിച്ചു.