വാഷിങ്ടണ് ഡിസി: യുഎസ് പാര്ലമെന്റിലേക്ക് അതിക്രമിച്ചു കടന്ന് ട്രംപ് അനുകൂലികള്. പാര്ലമെന്റിന്റെ ഇരുസഭകളും ചേരുന്നതിനിടെയാണ് സംഘര്ഷം ഉണ്ടായത്. ഡോണള്ഡ് ട്രംപിന്റെ അനുയായികളും പോലീസും തമ്മില് അക്രമാസക്തമായ ഏറ്റുമുട്ടലുകള് ഉണ്ടായതിനാല് യുഎസ് കോണ്ഗ്രസിന്റെ ഇരുസഭകളും അടിയന്തരമായി നിര്ത്തിവയ്ക്കുകയും കോണ്ഗ്രസ് അംഗങ്ങളെ ഒഴിപ്പിക്കുകയും ചെയ്തു.
അതിക്രമിച്ച് കയറിയ ട്രംപ് അനുകൂലികള് പൊലീസുമായി ഏറ്റുമുട്ടി. പൊലീസ് വെടിവയ്പ്പില് ട്രംപ് അനുകൂലിയെന്ന് സംശയിക്കുന്ന ഒരു സ്ത്രീ കൊല്ലപ്പെട്ടു. പാര്ലമെന്റ് സമ്മേളിക്കുന്നതിടെ ഇത്തരമൊരു സുരക്ഷാവീഴ്ച യുഎസ് ചരിത്രത്തില് ഇതാദ്യമാണ്.നിയുക്ത പ്രസിഡന്റ് ജോ ബൈഡന്റെ വിജയം അംഗീകരിക്കാന് യുഎസ് കോണ്ഗ്രസിന്റെ ഇരു സഭകളും സമ്മേളിക്കുന്നതിനിടെയാണ് ആയിരക്കണക്കിനു ട്രംപ് അനുകൂലികള് കാപ്പിറ്റോള് മന്ദിരത്തിന് അകത്തുകടന്നത്. സ്ഥാനമൊഴിയുന്ന പ്രസിഡന്റ് ട്രംപിനെ അനുകൂലിക്കുന്നവര് മന്ദിരത്തിന് പുറത്തെത്തുകയും പോലീസുമായി ഏറ്റുമുട്ടുകയായിരുന്നു. പോലീസ് ബാരിക്കേഡുകള് തകര്ത്ത് ഇവര് അകത്ത് പ്രവേശിക്കുകയായിരുന്നു.പ്രതിഷേധക്കാരോടു സമാധാനം പാലിക്കാന് അഭ്യര്ഥിച്ച ട്രംപ് ജോ ബൈഡന്റെ വിജയം അംഗീകരിക്കില്ലെന്നു ആവര്ത്തിച്ചു. സംഭവത്തില് ലോകമെമ്ബാടുമുള്ള നേതാക്കള് അപലപിച്ചു.