തിരുവനന്തപുരം: ആഴക്കടല് മത്സ്യബന്ധന വിവാദത്തില് സര്ക്കാരിനെതിരെ കൂടുതല് രേഖകള് പുറത്ത് വിട്ട് പ്രതിപക്ഷ നേതാവ് രമേശ് ചെന്നിത്തല. ഇ എം സി സിയുമായി അസന്ഡില് വെച്ച് ഒപ്പുവെച്ച ധാരണാപത്രവും പള്ളിപ്പുറത്ത് ഭൂമി അനുവദിച്ച സര്ക്കാരിന്റെ ഉത്തരവുമാണ് ചെന്നിത്തല പുറത്തുവിട്ടത്.
അമേരിക്കന് മോഡല് അറബിക്കടലില് എന്നായിരുന്നല്ലോ സിപിഎമ്മിന്റെ പഴയ മുദ്രാവാക്യം. ഇപ്പോള് അറബിക്കടലില് അമേരിക്കക്കാരുടെ കപ്പലുകളെയാണ് സിപിഎം നിറയ്ക്കുന്നത്. ഇ.പി. ജയരാജന് അവര് നല്കിയ അപേക്ഷയാണ് പ്രതിപക്ഷനേതാവിന് കിട്ടിയതെന്നും അതിലെ വിവരങ്ങളാണ് കരാറെന്നമട്ടില് പ്രചിരിക്കുന്നതെന്നും സര്ക്കാരിന്റെ ഒരു രേഖയും പുറത്തുപോയിട്ടില്ലെന്നും മുഖ്യമന്ത്രി പറയുന്നു. ഇ.എം.സി.സിക്കാര് വളരെ രഹസ്യമായി മന്ത്രി ഇ.പി.ജയരാജന് നല്കിയ അപേക്ഷ എങ്ങനെ പ്രതിപക്ഷനേതാവിന് കിട്ടി എന്നതിലാണ് മുഖ്യമന്ത്രി ദുരൂഹത കാണുന്നത്. മുഖ്യമന്ത്രി അങ്ങനെ ദുരൂഹത കാണേണ്ട കാര്യമില്ല. ഉണര്ന്നിരിക്കുന്ന പ്രതിപക്ഷത്തിന് കിട്ടേണ്ട രേഖകളെല്ലാം കിട്ടും. മന്ത്രി ഇ.പി. ജയരാജന് സ്വന്തം ലറ്റര് പാഡില്, സ്വന്തം കയ്യക്ഷരത്തില് മരുമകന് ജോലി കൊടുക്കാന് ഇറക്കിയ ഉത്തരവ് എനിക്ക് കിട്ടിയില്ലേ? അങ്ങനെയല്ലേ അന്ന് ഇ.പി. ജയരാജന് രാജിവയ്ക്കേണ്ടിവന്നത്. മുഖ്യമന്ത്രി അത് മറുന്നുപോയോ? അതിന് ശേഷം ബ്രൂവറി- ഡിസ്ററിലറി ഇടപാട്, മസാല ബോണ്ട്, ട്രാന്സ്ഗ്രിഡ്, സ്പ്രിങ്ളര് തുടങ്ങി എത്രയെത്ര അഴിമതിയുടെ രേഖകള് പ്രതിപക്ഷനേതാവിന് കിട്ടിയിട്ടുണ്ട്. അതിനാല് മുഖ്യമന്ത്രി ദുരൂഹത ഒന്നും കാണേണ്ട-രമേശ് ചെന്നിത്തല മറുപടി നല്കുന്നു.
ഞാന് ഈ വിവരം ആദ്യം ഉന്നയിച്ചപ്പോള് ഏത് ഇ.എം.സി.സി, എന്ത് ഇ.എം.സി.സി, ഞാനങ്ങനെ ഒന്നിനെക്കുറിച്ച് കേട്ടിട്ടേ ഇല്ലെന്നാണല്ലോ മന്ത്രി മെഴ്സിക്കുട്ടിയമ്മ ആദ്യം പറഞ്ഞത്. പിന്നീട് ന്യൂയോര്ക്കില് വച്ച് ഇവരെ കണ്ടിട്ടുണ്ടാകാം എന്ന് മന്ത്രിക്ക് സമ്മതിക്കണ്ടിവന്നു. എന്നാല് കേരളത്തില്വച്ച് ഇവരെ കണ്ടിട്ടേ ഇല്ലെന്നും അവരുമായി ഒരു കരാറും ഉണ്ടാക്കിയിട്ടില്ലെന്നുമാണ് പിന്നീട് മന്ത്രി മെഴ്സികുട്ടിയമ്മ പറഞ്ഞത്. . ഇ.എം.സി.സി. അനധികൃതരുമായി ഈ പദ്ധതിയെക്കുുറിച്ച് ചര്ച്ച ചെയ്യുന്ന ഫോട്ടോ ഞാന് ഇന്നലെ പുറത്തു വിട്ടതോടെ മന്ത്രി വീണ്ടും മലക്കം മറിഞ്ഞു. അവരെ കണ്ടു, ചര്ച്ച ചെയ്തു, എന്നാല്, ഈ പദ്ധതി നടപ്പില്ലെന്ന് അപ്പോള് തന്നെ പറഞ്ഞ് അവരെ തിരിച്ചയച്ചു എന്നാണ് മന്ത്രി അപ്പോള് പറഞ്ഞത്. അതും കള്ളമാണ്. ആ പദ്ധതി നടക്കുകയില്ലെന്ന് പറഞ്ഞ് മന്ത്രി അത് തള്ളിക്കളഞ്ഞെങ്കില് എങ്ങനെ നാലേക്കര് സ്ഥലം അവര്ക്ക് പള്ളിപ്പുറത്ത് പദ്ധതി നടപ്പാക്കാന് കിട്ടി. സര്ക്കാരിന് കീഴിലെ കേരള ഷിപ്പിങ് ആന്ഡ് ഇന്ലാന്റ് നാവിഗേഷന് കോര്പ്പറേഷന് എങ്ങനെ ഇ.എം.സി.സിയുമായി പദ്ധതിയുടെ ഭാഗമായുള്ള രണ്ടാമത്തെ എം.ഒ.യു ഒപ്പിട്ടു? . മന്ത്രി മെഴ്സികുട്ടിയമ്മ നടക്കില്ലെന്ന് പറഞ്ഞ് ഓടിച്ചുവിട്ട ഇ.എം.സി.സിയെ വ്യവസായ വകുപ്പും മുഖ്യമന്ത്രിയുടെ വകുപ്പും വിളിച്ചിരുത്തി പദ്ധതി നടപ്പാക്കിച്ചു തുടങ്ങി എന്നാണോ നമ്മള് മനസ്സിലാക്കേണ്ടത്? കള്ളത്തരം മറച്ചുവയ്ക്കാന് എന്തെല്ലാം അഭ്യാസങ്ങളാണ് മെഴ്സികുട്ടിയമ്മ നടത്തുന്നത്-ചെന്നിത്തല ചോദിച്ചു.