മോഹന്ലാലിനെ നായകനാക്കി പ്രിയദര്ശന് ഒരുക്കുന്ന ബ്രഹ്മാണ്ഡചിത്രം ‘മരക്കാര് അറബിക്കടലിന്റെ സിംഹം’ ഓണത്തിന് തീയേറ്ററുകളിലെത്തും. കൊവിഡ് മഹാമാരിക്കിടെ പലതവണ റിലീസ് തീയതി മാറ്റിയശേഷമാണ് ചിത്രം ഓണം റിലീസായി ഓഗസ്റ്റ് പന്ത്രണ്ടിന് പുറത്തിറങ്ങുമെന്നാണ് ഔദ്യോഗിക അറിയിപ്പ് വന്നിരിക്കുന്നത്. മോഹന്ലാല് തന്നെയാണ് അദ്ദേഹത്തിന്റെ ഫേസ്ബുക്ക് പേജിലൂടെ ഇക്കാര്യം വ്യക്തമാക്കിയിരിക്കുന്നത്. സ്നേഹത്തോടെ, നിറഞ്ഞ മനസോടെ പ്രതീക്ഷിക്കുകയാണ്, ഈ വരുന്ന ഓഗസ്റ്റ് 12ന്, ഓണം റിലീസായി ‘മരക്കാര് അറബിക്കടലിന്റെ സിംഹം’ നിങ്ങളുടെ മുന്നിലെത്തിക്കാന് ഞങ്ങള്ക്ക് കഴിയുമെന്ന്. അതിനു നിങ്ങളുടെ പ്രാര്ത്ഥനയും പിന്തുണയും ഉണ്ടാകുമെന്ന വിശ്വാസത്തോടെ ഞങ്ങള് മുന്നോട്ട് നീങ്ങുന്നു എന്നാണ് മോഹന്ലാല് ഫേസ്ബുക്കില് കുറിച്ചത്. തിയേറ്ററില് എത്തുന്നതിനും മുന്നേ തന്നെ മികച്ച ഫീച്ചര് ഫിലിമിനുളള അവാര്ഡ് അടക്കം മൂന്ന് ദേശീയ പുരസ്കാരങ്ങള് ചിത്രം നേടിയിരുന്നു.
2021-06-18