ഇടുക്കി: അന്തരിച്ച തൃക്കാക്കര എംഎല്എ പി.ടി തോമസിന് ആദരാഞ്ജലികള് അര്പ്പിച്ച് ജന്മനാടും നാട്ടുകാരും. വെല്ലൂര് ക്രിസ്ത്യന് മെഡിക്കല് കോളേജില് നിന്ന് പുലര്ച്ചയോടെ ഇടുക്കി ഉപ്പുതോടിലെ വീട്ടിലെത്തിച്ച മൃതദേഹം വിലാപയാത്രയായി തൊടുപുഴയിലേക്ക് കൊണ്ടുപോയി. ആയിരങ്ങളാണ് പ്രിയപ്പെട്ട നേതാവിന് ആദരാഞ്ജലികള് അര്പ്പിക്കാന് വീട്ടിലും വഴിയോരത്തുമായി എത്തിയത്.
വാർത്തകൾക്ക് വാട്സാപ്പ് ഗ്രൂപ്പിൽ അംഗമാകു
ജില്ലാ കളക്ടറും ഇടുക്കി എംപി ഡീന് കുര്യാക്കോസും ചേര്ന്ന് പുലര്ച്ചെയാണ് വെല്ലൂരിലെ ആശുപത്രിയില് നിന്ന് കേരളത്തിലേക്ക് കൊണ്ടുവന്ന പി.ടി.തോമസിന്റെ മൃതദേഹം സംസ്ഥാന അതിര്ത്തിയില് ഏറ്റുവാങ്ങിയത്. പുലര്ച്ചെ 2.45 ഓടെ ഇടുക്കിയിലെത്തിച്ച മൃതദേഹം ഉപ്പുതോട്ടത്തിലെ വീട്ടില് പൊതുദര്ശനത്തിന് വെച്ചു. പാലാ, ഇടുക്കി ബിഷപ്പുമാര് പി.ടിയുടെ വീട്ടിലെത്തി ആദരാഞ്ജലി അര്പ്പിച്ചു. തൊടുപുഴയില് രാജീവ് ഭവനിലും തുടര്ന്ന് എറണാകുളം ഡിസിസി ഓഫീസിലെയും പൊതു ദർശനത്തിനു ശേഷം മൃതദേഹം എറണാകുളം ടൗണ് ഹാളിലും പൊതുദര്ശനത്തിന് വെയ്ക്കും. വൈകിട്ട് 5.30ന് കൊച്ചി രവിപുരം ശ്മശാനത്തിലാണ് സംസ്കാര ചടങ്ങുകള് നടക്കുക. കോണ്ഗ്രസ് നേതാവ് രാഹുല് ഗാന്ധി ഉള്പ്പെടെയുള്ളവര് അന്തിമോപചാരം അര്പ്പിക്കാനെത്തും.
തന്റെ സംസ്കാര ചടങ്ങുകള് എങ്ങനെ വേണമെന്ന കൃത്യമായ നിര്ദേശം നല്കിയ ശേഷമാണ് പിടി തോമസിന്റെ വിയോഗം. അന്ത്യാഭിലാഷം സംബന്ധിച്ച് അദ്ദേഹത്തിന്റെ നിര്ദേശ പ്രകാരം സുഹൃത്തുക്കള് ചടങ്ങുകളെക്കുറിച്ച് എഴുതിവച്ചിരുന്നു. ഇന്നലെ രാവിലെ 10.15ഓടെ വെല്ലൂര് ആശുപത്രിയില് ചികിത്സയിലിരിക്കെയാണ് പി.ടി വിടപറഞ്ഞത്.