ന്യൂഡല്ഹി: ഇന്ത്യന് രഹസ്യങ്ങള് പാകിസ്താന് ചോര്ത്തി നല്കിയതിന് അറസ്റ്റിലായ ഹരിയാന സ്വദേശിയായ വ്ളോഗര് ജ്യോതി മല്ഹോത്രയുടെ വാട്ട്സ്ആപ്പ് ചാറ്റുകള് പുറത്ത്. പാക് ചാര സംഘടനയായ ഐഎസ്ഐയുടെ ഉദ്യോഗസ്ഥന് അലി ഹസനുമായുള്ള ജ്യോതിയുടെ വാട്ട്സ് ആപ്പ് ചാറ്റുകളാണ് പുറത്തുവന്നിരിക്കുന്നത്. പാകിസ്താനില് വിവാഹിതയാകണമെന്ന ആഗ്രഹം ജ്യോതി ഇയാളുമായി പങ്കുവച്ചിട്ടുണ്ട്.
അന്വേഷണത്തിന്റെ ഭാഗമായി ജ്യോതിയുടെ മൊബൈലടക്കം ഉപകരണങ്ങള് എന്ഐഎ സംഘം പിടിച്ചെടുത്തിരുന്നു. ഇവ ഫോറന്സിക് പരിശോധനയ്ക്കടക്കം വിധേയമാക്കിയിരുന്നു. ഇവ പരിശോധിച്ചതില് നിന്നാണ് ഉദ്യോഗസ്ഥര്ക്ക് നിര്ണായക വിവരങ്ങള് ലഭിച്ചത്. ചാറ്റുകളില് ജ്യോതി പാകിസ്താനെ പ്രശംസിക്കുകയും ചെയ്യുന്നുണ്ട്.
ജ്യോതി പാകിസ്താന് ഹൈക്കമ്മീഷന് ഉദ്യോഗസ്ഥനായ ഡാനിഷിനെ വിവാഹം ചെയ്തതായി റിപ്പോര്ട്ടുകളുണ്ടായിരുന്നു. ഇതിനിടെയാണ് കൂടുതല് വിശദാംശങ്ങള് പുറത്തുവന്നിരിക്കുന്നത്. ഡാനിഷാണ് ജ്യോതിക്ക് ഐഎസ്ഐ ഉദ്യോഗസ്ഥന് അലി ഹസനെ പരിചയപ്പെടുത്തുന്നത്. ജ്യോതി അലി ഹസനെ പല തവണ ബന്ധപ്പെട്ടതായി എന്ഐഎയ്ക്ക് വ്യക്തമായിട്ടുണ്ട്.
പഹല്ഗാം ഭീകരാക്രമണത്തിന് മുന്പ് ജ്യോതി പാകിസ്താന് സന്ദര്ശിച്ച് അവിടുത്തെ ഉദ്യോഗസ്ഥരെ കണ്ടിട്ടുണ്ട്. രഹസ്യവിവരങ്ങള് കൈമാറാന് ജ്യോതിയും ഡാനിഷും അലി ഹസനും കോഡ് ഭാഷയാണ് ഉപയോഗിച്ചത്. ഓപ്പറേഷന് സിന്ദൂറിന്റെ സമയത്തടക്കം ജ്യോതി ഇവര്ക്ക് ഇന്ത്യയുമായി ബന്ധപ്പെട്ട വിവരങ്ങള് ചോര്ത്തിയിട്ടുണ്ട്.
ബ്ലാക്ക് ഔട്ട് (ലൈറ്റുകളും വെളിച്ചങ്ങളും അണച്ച് സംരക്ഷണമൊരുക്കല്) പ്രഖ്യാപിക്കപ്പെട്ട സ്ഥലങ്ങളെക്കുറിച്ചടക്കം ജ്യോതി വിവരങ്ങള് കൈമാറിയതായി വ്യക്തമായി.ബംഗ്ലാദേശ് സന്ദര്ശിക്കാന് വിസ തരപ്പെടുത്താന് ജ്യോതി ശ്രമം നടത്തിയതിന്റെ രേഖകള് എന്ഐഎ കണ്ടെത്തിയിരുന്നു. ജ്യോതിയുടെ ബംഗ്ലാദേശ് സന്ദര്ശന ഉദ്ദേശത്തെക്കുറിച്ച് അന്വേഷണസംഘം പരിശോധിച്ച് വരികയാണ്.
കഴിഞ്ഞയാഴ്ചയാണ് ഹരിയാനയിലെ ഹിസാറില് നിന്ന് ജ്യോതി മല്ഹോത്ര പിടിയിലായത്. 33 കാരിയുടെ ട്രാവല് വിത്ത് ജെഒ എന്ന യൂട്യൂബ് ചാനലിന് നാല് ലക്ഷത്തോളം സബ്സ്ക്രൈബേഴ്സ് ഉണ്ട്. 450ലേറെ വീഡിയോകള് ഇതിനകം പോസ്റ്റ് ചെയ്തിട്ടുമുണ്ട്. അതില് പാകിസ്താന് സന്ദര്ശിച്ചതിന്റെ വീഡിയോകളും ഉള്പ്പെടുന്നു.