മുംബൈ: രാജ്യാന്തര വിപണിയിൽ അസംസ്കൃത എണ്ണവില കുതിച്ചുയരുന്നതിനിടെ ഇന്ത്യൻ രൂപയുടെ മൂല്യത്തിൽ വൻ ഇടിവ്. ചരിത്രത്തിലാദ്യമായി ഡോളറിനെതിരെ രൂപയുടെ മൂല്യം 92 എന്ന നിലയിലെത്തി. ബുധനാഴ്ച രാവിലെ വ്യാപാരം ആരംഭിച്ചപ്പോൾ ഡോളറിന് 92.17 എന്ന നിലവാരത്തിലേക്കാണ് രൂപ കൂപ്പുകുത്തിയത്. പശ്ചിമേഷ്യയിൽ ഗുരുതരമായി തുടരുന്ന സംഘർഷങ്ങളാണ് ഇന്ത്യൻ സമ്പദ്വ്യവസ്ഥയ്ക്ക് തിരിച്ചടിയാകുന്നത്.
രൂപയുടെ മൂല്യത്തകർച്ച ഇന്ത്യയുടെ ഇറക്കുമതി ചെലവ് കുത്തനെ ഉയർത്തും. ഇന്ത്യയുടെ ഊർജ്ജ ആവശ്യത്തിന്റെ 80 ശതമാനവും ഇറക്കുമതി ചെയ്യുന്നതിനാൽ, എണ്ണവിലയിലെ വർദ്ധനവ് രാജ്യത്തെ പണപ്പെരുപ്പത്തിന് ആക്കം കൂട്ടും. ക്രൂഡ് ഓയിലിന് പുറമെ ഇലക്ട്രോണിക് ഉപകരണങ്ങൾ, വളം, യന്ത്രസാമഗ്രികൾ എന്നിവയുടെ വിലയും വർദ്ധിക്കാൻ ഇത് കാരണമാകും. അസംസ്കൃത എണ്ണവിലയിൽ ഉണ്ടാകുന്ന ഓരോ ഡോളറിന്റെ വർദ്ധനവും ഇന്ത്യയുടെ വാർഷിക ഇറക്കുമതി ചിലവിൽ 1.5 മുതൽ 2 ബില്യൺ ഡോളർ വരെ അധിക ബാധ്യതയുണ്ടാക്കുമെന്ന് വിദഗ്ധർ ചൂണ്ടിക്കാട്ടുന്നു.
രൂപയുടെ തകർച്ച രാജ്യത്തെ ഇറക്കുമതിക്കാരെയും സാധാരണക്കാരെയും ഒരുപോലെ ബാധിക്കുമ്പോൾ, കയറ്റുമതി മേഖലയ്ക്ക് ഇത് ആശ്വാസമാകും. പ്രത്യേകിച്ച് ഇന്ത്യയിലെ ഐടി സേവന മേഖലയ്ക്കും ഫാർമസ്യൂട്ടിക്കൽ രംഗത്തിനും ഇത് നേട്ടമുണ്ടാക്കും. ഐടി കമ്പനികളുടെ വരുമാനം ഡോളറിലായതിനാൽ, രൂപയുടെ മൂല്യം കുറയുമ്പോൾ ലാഭവിഹിതം വർദ്ധിക്കും. ആഗോളതലത്തിൽ ഐടി മേഖല നേരിടുന്ന മാന്ദ്യത്തിനിടയിൽ രൂപയുടെ ഈ മൂല്യത്തകർച്ച കമ്പനികൾക്ക് നേട്ടമാകും.
പണപ്പെരുപ്പം നിയന്ത്രിക്കാൻ റിസർവ് ബാങ്ക് പലിശ നിരക്കുകൾ ഉയർന്ന നിലയിൽ തന്നെ നിലനിർത്താൻ നിർബന്ധിതരായേക്കും. നിലവിൽ റിപ്പോ നിരക്ക് 5.25 ശതമാനത്തിലാണ് തുടരുന്നത്. എണ്ണവിലയിലെ അനിശ്ചിതത്വം തുടരുകയാണെങ്കിൽ ആഭ്യന്തര വിപണിയിൽ ഇന്ധനവില വർദ്ധിപ്പിക്കേണ്ട സാഹചര്യവും ഉണ്ടായേക്കാം. ഇത് ഉപഭോക്തൃ ചെലവുകളെയും രാജ്യത്തിന്റെ സാമ്പത്തിക വളർച്ചയെയും ബാധിച്ചേക്കുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. പടിഞ്ഞാറൻ ഏഷ്യയിലെ യുദ്ധസമാനമായ സാഹചര്യം എത്രനാൾ നീണ്ടുനിൽക്കും എന്നതിനെ ആശ്രയിച്ചിരിക്കും രൂപയുടെ വരുംദിവസങ്ങളിലെ പ്രകടനം.