കോഴിക്കോട്: മലയാളികൾക്കുള്ള പെരുന്നാൾ സമ്മാനമായി ഇന്ത്യയിലെ ആദ്യത്തെ ’സ്റ്റീൽ സ്ലൈഡ്’ സംവിധാനവും ഡിജിറ്റൽ വിനോദരംഗത്തെ പുതുപുത്തൻ ഗെയിമിംഗ് പ്ലാറ്റ്ഫോമായ ‘ഹോളോ സ്പേസ്’ ഉം നഗരത്തിലെ ഏറ്റവും വലുതും ജനപ്രിയ വ്യാപാരസമുച്ചയവുമായ ‘ഹൈലൈറ്റ് മാളി’ൽ പൊതുജനങ്ങൾക്കായി തുറന്നുകൊടുത്തു. അത്യാധുനിക സാങ്കേതികവിദ്യയുടെയും അമ്പരിപ്പിക്കുന്ന എഞ്ചിനീയറിംഗിൻെറയും സഹായത്തോടെ മാളിന്റെ മൂന്നാം നിലയിൽ നിന്ന് നേരിട്ട് താഴത്തെ നിലയിലേക്ക് തെന്നി ഇറങ്ങാൻ കഴിയുന്ന ‘വണ്ടർ സ്ലൈഡ്’ എന്ന സംവിധാനവും ‘ഹോളോ സ്പേസ്’ ഉം ഹൈലൈറ്റ് അർബൻ സി.ഇ.ഒ മുഹമ്മദ് ഫവാസ് ഉദ്ഘാടനം ചെയ്തു.
ലോകത്തിലെ പ്രമുഖ വിമാനത്താവളങ്ങളായ സിംഗപൂർ ചാംങി എയർപോർട്ട്, അബുദുബായ് ഇൻറർ നാഷണൽ എയർപോർട്ട് തുടങ്ങിയ ചിലയിടങ്ങളിൽ മാത്രമുള്ള ’സ്റ്റീൽ സ്ലൈഡ്’ സംവിധാനം അന്താരാഷ്ട്ര സുരക്ഷാ മാനദണ്ഡങ്ങൾ പാലിച്ചാണ് ഇവിടെയും ഒരുക്കിയിരിക്കുന്നതെന്ന് ‘സ്നോ ഫാൻറസി’ ഡയറക്ടർമാരായ ടി.എസ്. വിജയൻ, വിപിൻ സ്കറിയ, സിബിൻ സ്കറിയ, ആദിത്യ അശോാകൻ എന്നിവർ അറിയിച്ചു. അഞ്ചു വയസ്സിന് മുകളിലുള്ള ആർക്കും ഇത് സുരക്ഷിതമായി ഉപയോഗിക്കാൻ കഴിയുമെന്നും അവർ പറഞ്ഞു
കൂടാതെ മാളിലെ മൂന്നാം നിലയിലുള്ള ‘പലാക്സി സിനിമാസ്’ ന് സമീപത്തായി ഒരുക്കിയ ‘ഹോളോ സ്പേസ്’ എന്ന പ്രൊജക്ഷൻ സാങ്കേതികവിദ്യയും ഇൻട്രാക്ടീവ് ഗെയിമിംഗും സംയോജിപ്പിച്ച പുതിയ ഡിജിറ്റൽ വിനോദ പ്ലാറ്റ്ഫോം ഉപയോഗിച്ച് സന്ദർശകർക്ക് ശരീര ചലനങ്ങളിലൂടെ ഗെയിമുകളിൽ പങ്കെടുക്കാവുന്നതാണ്. വെർച്വൽ ഫുട്ബോൾ കിക്ക് ചെയ്യുക, സ്ക്രീനിലുള്ള ജീവജാലങ്ങളെ സ്പർശിക്കുകയും നിയന്ത്രിക്കുകയും ചെയ്യുക, സ്ക്രീനിൽ വരക്കുന്ന ചിത്രങ്ങൾക്ക് ജീവൻ ലഭിച്ചതായി കാണുക, ഡിജിറ്റൽ കുളത്തിൽ മീൻ പിടിക്കുക തുടങ്ങിയ വിനോദങ്ങൾ ഇതിലൂടെ ആസ്വദിക്കാനാവും. നിലവിൽ ഹൈലൈറ്റ് മാളിലെ ആകർഷകകേന്ദ്രങ്ങളിലൊന്നായ ‘സ്നോ ഫാൻറസി’യുടെ പ്രമോട്ടർമാർതന്നെയാണ് ‘വണ്ടർ സ്ലൈഡ്’ എന്ന വിസ്മയം ഒരുക്കിയിരിക്കുന്നത്.