തൃശൂർ: വാടനപ്പള്ളിയിൽ ബിജെപി പ്രവർത്തകർ നടത്തിയ കിറ്റ് വിതരണം യുഡിഎഫും എൽഡിഎഫും ചേർന്ന് തടഞ്ഞതായി റിപ്പോർട്ട്. വാടനപ്പള്ളിക്ക് സമീപമുള്ള ആത്മാവ് ജംഗ്ഷനിൽ കിറ്റ് വിതരണം നടത്താൻ ശ്രമിക്കുമ്പോഴാണ് സംഭവം ഉണ്ടായത്. ഏകദേശം രണ്ടായിരത്തോളം കിറ്റുകൾ വിതരണം ചെയ്യാൻ എത്തിച്ചതായി എൽഡിഎഫ് ആരോപിച്ചു.
യുഡിഎഫ്-എൽഡിഎഫ് പ്രവർത്തകർ സ്ഥലത്തെത്തിയതോടെ സൂപ്പർമാർക്കറ്റിന് മുന്നിൽ സംഘർഷാവസ്ഥ രൂപപ്പെട്ടു. നാട്ടുകാരുടെ വിവരം ലഭിച്ചെത്തിയതാണെന്നും കഴിഞ്ഞ ദിവസം ഏകദേശം 1500 കിറ്റുകൾ വിതരണം ചെയ്തതായും അവർ ആരോപിച്ചു. യുവമോർച്ച നേതാവിന്റെ നേതൃത്വത്തിലാണ് കിറ്റ് വിതരണം നടന്നതെന്നും ആരോപണം ഉയർന്നു.
കിറ്റ് വിതരണം വഴി രാഷ്ട്രീയ നേട്ടം ലക്ഷ്യമിടുന്നതാണ് ബിജെപിയുടെ ശ്രമമെന്നും കഴിഞ്ഞ രണ്ട് ദിവസമായി ഇത്തരം പ്രവർത്തനം തുടരുകയാണെന്നും യുഡിഎഫ്-എൽഡിഎഫ് പ്രവർത്തകർ മാധ്യമങ്ങളോട് പറഞ്ഞു.
ജനാധിപത്യത്തെ പണത്താൽ സ്വാധീനിക്കാൻ ബിജെപി ശ്രമിക്കുന്നുവെന്ന് യുഡിഎഫ് സ്ഥാനാർത്ഥി ടി.എൻ. പ്രതാപൻ ആരോപിച്ചു. ശക്തമായ പ്രതിഷേധം തുടരുമെന്ന് എൽഡിഎഫ് സ്ഥാനാർത്ഥി പ്രൊഫ. സി. രവീന്ദ്രനാഥ് അറിയിച്ചു. ഇതിന് മുമ്പ് ഒളരിയിലെ ഒരു സൂപ്പർമാർക്കറ്റിലും സമാനമായി കിറ്റ് വിതരണം നടന്നിരുന്നു. ആ സംഭവത്തിൽ പൊലീസ് കേസെടുത്ത് കട സീൽ ചെയ്തിരുന്നു.