ന്യൂയോർക്ക്: മഞ്ഞക്കടലായി മാറിയ ന്യൂയോർക്കിലെ ന്യൂ ജേഴ്സി സ്റ്റേഡിയത്തെ സാക്ഷിയാക്കി ബ്രസീലിന്റെ ലോകകപ്പ് മോഹങ്ങൾക്ക് കനത്ത പ്രഹരം. പ്രീക്വാർട്ടർ പോരാട്ടത്തിൽ ബ്രസീലിനെ തകർത്ത് നോർവേ ചരിത്രത്തിലാദ്യമായി ലോകകപ്പിന്റെ ക്വാർട്ടർ ഫൈനലിൽ പ്രവേശിച്ചു. അവസാന നിമിഷം വരെ ആവേശം നിറഞ്ഞ മത്സരത്തിൽ നോർവേയുടെ സൂപ്പർ സ്ട്രൈക്കർ എർലിങ് ഹാളണ്ട് എന്ന മഹാമേരുവിന് മുന്നിൽ ബ്രസീലിയൻ പ്രതിരോധം പതറുകയായിരുന്നു. തോൽവിയോടെ കാനറികൾക്ക് കണ്ണീരോടെ കളംവിടേണ്ടി വന്നു.
നോർവേയ്ക്കെതിരായ വിചിത്രമായ തങ്ങളുടെ ഫുട്ബോൾ റെക്കോഡ് തിരുത്താമെന്ന് കരുതിയാണ് ബ്രസീൽ ഈ പ്രീക്വാർട്ടർ മത്സരത്തിന് ഇറങ്ങിയത്. എന്നാൽ ചരിത്രം ആവർത്തിക്കപ്പെടുകയായിരുന്നു.
89 ടീമുകൾ, വീഴ്ത്താനാകാത്ത ഒരേയൊരു നോർവേ!
രാജ്യാന്തര ഫുട്ബോളിൽ ഇതുവരെ 88 ടീമുകളെ നേരിട്ട് വിജയം വരിച്ചിട്ടുള്ള ബ്രസീലിന്, ചരിത്രത്തിൽ ഒരിക്കൽ പോലും തോൽപ്പിക്കാനാവാത്ത ഒരേയൊരു ടീമെന്ന തങ്ങളുടെ കറുത്ത റെക്കോഡ് ഇത്തവണയും മാറ്റിയെഴുതാനായില്ല. ഈ മത്സരത്തോടെ അന്താരാഷ്ട്ര ഫുട്ബോളിൽ ഇരുടീമുകളും ആറ് തവണയാണ് നേർക്കുനേർ വന്നത്. ഇതിൽ മൂന്ന് മത്സരങ്ങൾ സമനിലയിൽ പിരിഞ്ഞപ്പോൾ, ഈ ലോകകപ്പ് പ്രീക്വാർട്ടർ മത്സരമടക്കം മൂന്ന് മത്സരങ്ങളിൽ വിജയം നോർവേയ്ക്കൊപ്പമായിരുന്നു. ഒരു തവണ പോലും കാനറികൾക്ക് നോർവേയ്ക്കെതിരെ വിജയം തൊടാനായിട്ടില്ല.
1998-ന്റെ ആവർത്തനം
മുൻപും ലോകകപ്പ് വേദിയിൽ ബ്രസീലിനെ നോർവേ അട്ടിമറിച്ചിട്ടുണ്ട്. 1998-ലെ ഫ്രാൻസ് ലോകകപ്പിൽ ഒന്നിനെതിരേ രണ്ടു ഗോളുകൾക്കാണ് ഗ്രൂപ്പ് ഘട്ടത്തിൽ നോർവേ ബ്രസീലിനെ അട്ടിമറിച്ചത്. പിന്നീട് 2006-ൽ നടന്ന സൗഹൃദ മത്സരത്തിൽ ഇരുടീമുകളും ഓരോ ഗോൾ വീതമടിച്ച് സമനിലയിൽ പിരിഞ്ഞു. ഒടുവിൽ ഇതാ വർഷങ്ങൾക്ക് ശേഷം മറ്റൊരു ലോകകപ്പ് വേദിയിൽ പ്രീക്വാർട്ടറിലെ നിർണായക മത്സരത്തിലും ബ്രസീലിന്റെ വഴിമുടക്കാൻ തന്നെ നോർവേയ്ക്കായി. ലോകകപ്പിൽ നിന്ന് ബ്രസീൽ പുറത്തായതോടെ കോടിക്കണക്കിന് വരുന്ന ആരാധകരാണ് നിരാശയിലായത്.