തിരുവനന്തപുരം : ഗോവയില് ദുരൂഹ സാഹചര്യത്തില് മരിച്ചനിലയില് കണ്ടെത്തിയ അഞ്ജന ഹരീഷിന്റെ അമ്മ മിനി പ്രധാനമന്ത്രി നരേന്ദ്ര മോദിക്കു പരാതി നല്കി. അഞ്ജനയുടെ മരണം കൊലപാതകമാണെന്നും അന്വേഷണം വേണമെന്നും ആവശ്യപ്പെട്ടാണു പരാതി. ബലാത്സംഗം, ലൈംഗിക ചൂഷണം ഉള്പ്പെടെ നിരവധി ക്രൂരകൃത്യങ്ങള്ക്കിരയായാണ് അഞ്ജന മരിച്ചതെന്ന് സംശയിക്കുന്നതായും പരാതിയില് ചൂണ്ടിക്കാട്ടുന്നു. ആത്മഹത്യയാണെങ്കില് അതിലേക്കു നയിച്ച കാരണങ്ങള് വെളിച്ചത്തു കൊണ്ടുവരാന് സഹായിക്കണമെന്നും മിനി അഭ്യര്ത്ഥിച്ചു.
സാമൂഹ്യവിരുദ്ധരും ദേശവിരുദ്ധരുമായ ആളുകളും മയക്കുമരുന്നു മാഫിയകളും അഞ്ജനയുടെ മരണത്തിനു പിന്നിലുള്ളതായി സംശയിക്കുന്നുവെന്ന് പരാതിയിലുണ്ട്. ഗോവ, കേരള മുഖ്യമന്ത്രിമാര്ക്കും ദേശീയ, സംസ്ഥാന വനിത കമ്മിഷനും പരാതി നല്കിയിട്ടുണ്ട്.