ലോകത്ത് കോവിഡ് വ്യാപനം കൂടുതല് സങ്കീര്ണമാകുകയാണെന്ന മുന്നറിയിപ്പുമായി ലോകാരോഗ്യ സംഘടന. . കോവിഡ് ഭീഷണി ഒഴിഞ്ഞിട്ടില്ലെന്നും മുന്കരുതലില് പിന്നോട്ടുപോകരുതെന്നും ലോകാരോഗ്യ സംഘടന മുന്നറിയിപ്പ് നല്കി.
യൂറോപ്പിലെ സാഹചര്യം മെച്ചപ്പെടുന്നുണ്ടെങ്കിലും ആഗോള തലത്തില് സ്ഥിതി മോശം തന്നെയാണ്. കഴിഞ്ഞ 9 ദിവസങ്ങളിലും ഒരു ലക്ഷത്തിലധികം പേര്ക്ക് വീതം കോവിഡ് ബാധിച്ചു. കഴിഞ്ഞ ദിവസം 1,36,000 കേസുകളാണ് റിപ്പോര്ട്ട് ചെയ്യപ്പെട്ടതെന്നും ഇത് റെക്കോര്ഡാണെന്നും ലോകാരോഗ്യ സംഘടന തലവന് ടെഡ്രോസ് അദാനോം ഗെബ്രിയേസ് പറഞ്ഞു. ഇതില് 75 ശതമാനം കേസുകളും 10 രാജ്യങ്ങളില് നിന്നാണെന്നും അദ്ദേഹം കൂട്ടിച്ചേര്ത്തു.
പല രാജ്യങ്ങളിലും രോഗലക്ഷണമില്ലാത്ത വൈറസ് ബാധിതരെ തിരിച്ചറിഞ്ഞിട്ടുണ്ട്. എന്നാല് ഇവരില് നിന്ന് മറ്റുള്ളവരിലേക്ക് രോഗം പകര്ന്നതായി കണ്ടെത്താനായിട്ടില്ലെന്നും ലോകാരോഗ്യ സംഘടന വ്യക്തമാക്കി.