തിരുവനന്തപുരം: ആമയിഴഞ്ചാന് തോട്ടില് കാണാതായ തൊഴിലാളിയെ കണ്ടെത്താനായുള്ള തിരച്ചില് രാത്രിയിലും തുടരുന്നു. റെയിൽവേ പാളത്തിനടുത്തുള്ള മാൻഹോളിൽക്കൂടി റോബോട്ടിനെ ഇറക്കി പരിശോധിക്കുകയാണ് ഇപ്പോൾ.
കേരള സര്ക്കാരിന്റെ ജൻറോബോട്ടിക്സിൽ നിന്നുള്ള രണ്ട് റോബോട്ടുകളെയാണ് പരിശോധനയ്ക്കായി ഇറക്കിയിരിക്കുന്നത്. ക്യാമറ ഘടിപ്പിച്ച റോബോട്ടുകളെ ഉപയോഗിച്ച് മാലിന്യം നീക്കംചെയ്യുന്നതിനും പരിശോധന നടത്തുന്നതിനുമാണ് ശ്രമം.
ശനിയാഴ്ച രാവിലെയാണ് നഗരസഭയിലെ താത്കാലിക തൊഴിലാളിയായ മാരായമുട്ടം സ്വദേശി ജോയിയെ തോട്ടില് കാണാതായത്. തോട് വൃത്തിയാക്കുന്നതിനിടെയായിരുന്നു സംഭവം. മാലിന്യം തിങ്ങിനിറഞ്ഞതിനാല് ആദ്യഘട്ടത്തില് തോട്ടിലെ ടണലിനുള്ളിലേക്ക് പ്രവേശിക്കാന് രക്ഷാപ്രവര്ത്തകര്ക്കായില്ല. മാരായമുട്ടം സ്വദേശിയായ ജോയി എന്ന ക്രിസ്റ്റഫറിനെ റെയില്വേയിലെ ചില കരാറുകാരാണ് ജോലിക്കായി കൊണ്ടുപോയതെന്നാണ് നാട്ടുകാര് പറയുന്നത്. മാരായമുട്ടം വടകരയില് അമ്മയ്ക്കൊപ്പമാണ് അവിവാഹിതനായ ജോയിയുടെ താമസം. നാട്ടില് ആക്രിസാധനങ്ങള് ശേഖരിച്ചുവില്ക്കുന്നതായിരുന്നു വരുമാനമാര്ഗം. ഇതിനിടെയാണ് കരാറുകാര് വിളിച്ചപ്പോള് തോട് വൃത്തിയാക്കുന്ന ജോലിക്ക് പോയത്.