തിരുവനന്തപുരം: സിപിഐ നേതാവും പീരുമേട് എംഎല്എയുമായ വാഴൂര് സോമന് അന്തരിച്ചു. 72 വയസായിരുന്നു. ഹൃദയാഘാതത്തെ തുടര്ന്ന് തിരുവനന്തപുരത്തായിരുന്നു അന്ത്യം. ഔദ്യോഗിക പരിപാടി കഴിഞ്ഞ് മടങ്ങുന്നതിനിടെ കുഴഞ്ഞ് വീഴുകയായിരുന്നു. ഉടന് ശാസ്തമംഗലത്തെ സ്വകാര്യ ആശുപത്രിയില് എത്തിച്ചെങ്കിലും ചികിത്സയിലിരിക്കെ മരണം സംഭവിച്ചു.
പി.ടി.പി. നഗറില് റവന്യൂ വകുപ്പിന്റെ ഇടുക്കി ജില്ലാതല യോഗത്തില് പങ്കെടുക്കാനെത്തിയതായിരുന്നു അദ്ദേഹം. മടങ്ങുന്ന വഴിയാണ് അദ്ദേഹത്തിന് ഹൃദയാഘാതമുണ്ടായത്. തുടര്ന്ന്, റവന്യൂ മന്ത്രിയുടെ വാഹനത്തില് ഉടന് തന്നെ ശാസ്തമംഗലത്തെ സ്വകാര്യ ആശുപത്രിയില് എത്തിച്ചു. ഇവിടെ ചികിത്സയിലിരിക്കെ വാഴൂര് സോമന് എംഎല്എ മരണത്തിന് കീഴടങ്ങി.
ഇടുക്കിയിലെ പീരുമേട് നിയമസഭാ നിയോജക മണ്ഡലത്തില് നിന്ന് സിപിഐ ടിക്കറ്റില് വിജയിച്ചാണ് വാഴൂര് സോമന് നിയമസഭയിലെത്തിയത്. യുഡിഎഫ് സ്ഥാനാര്ഥി അഡ്വ. സിറിയക് തോമസിനെ 1835 വോട്ടിന്റെ ഭൂരിപക്ഷത്തിലാണ് വാഴൂര് സോമന് പരാജയപ്പെടുത്തിയത്.
ഇടുക്കിയിലെ തോട്ടം തൊഴിലാളികളെ സംഘടിപ്പിച്ച് വളര്ന്നുവന്ന നേതാവായിരുന്നു അദ്ദേഹം. എഐടിയുസി സംസ്ഥാന വൈസ് പ്രസിഡന്റ്, വെയര് ഹൗസിങ് കോര്പറേഷന് ചെയര്മാന്, തുടങ്ങിയ പദവികള് അദ്ദേഹം വഹിച്ചിട്ടുണ്ട്. ഭാര്യ: ബിന്ദു. മക്കള്: അഡ്വ. സോബിത്ത്, അഡ്വ. സോബിന്.