കോഴിക്കോട്: മദ്യപിച്ചുണ്ടായ തര്ക്കത്തിന് പിന്നാലെ കോഴിക്കോട് നഗരത്തില് കത്തിക്കുത്ത്. പട്ടാംപൊയില് സ്വദേശി ബിജീഷ് എന്നയാള്ക്കാണ് കുത്തേറ്റത്.ലിങ്ക് റോഡില് വച്ചുണ്ടായ തര്ക്കമാണ് ആക്രമണത്തില് കലാശിച്ചത്.
കുത്തേറ്റ് പരിക്കേറ്റ ബിജീഷിനെ കോഴിക്കോട് മെഡിക്കല് കോളജില് പ്രവേശിപ്പിച്ചു. ബിജീഷും മദ്യ ലഹരിയില് ആയതിനാല് ആരാണ് ആക്രമിച്ചതെന്നോ എന്താണ് ആക്രമണത്തിന്റെ കാരണമെന്നോ കണ്ടെത്താനായിട്ടില്ല. പരിക്കേറ്റ ബിജീഷിന് ശസ്ത്രക്രിയ വേണ്ടിവരുമെന്നാണ് ആശുപത്രി അധികൃതര് നല്കുന്ന വിവരം. ഇതിന് ശേഷം വിഷയത്തില് മൊഴിയുള്പ്പെടെ രേഖപ്പെടുത്തി കൂടുതല് വിവരങ്ങള് ശേഖരിക്കാനാണ് പൊലീസ് ഉള്പ്പെടെ ശ്രമിക്കുന്നത്.
പുലര്ച്ചെ രണ്ട് മണിയോടെ ആയിരുന്നു യുവാവിനെ കുത്തേറ്റ നിലയില് കണ്ടെത്തിയത്. നാട്ടുകാര് വിവരമറിയിച്ചതിന് പിന്നാലെ പൊലീസ് ഇടപെട്ടാണ് ഇയാളെ ആശുപത്രിയില് പ്രവേശിപ്പിച്ചത്.