ദില്ലി: മുൻ കരസേന മേധാവി ജനറൽ എം.എം. നരവനെയുടെ ആത്മകഥയുടെ പതിപ്പ് രാഹുൽ ഗാന്ധിക്ക് ലഭിച്ചതിനെച്ചൊല്ലി വിവാദം കൊഴുക്കുന്നു. പുസ്തകം ഇതുവരെ പ്രസിദ്ധീകരിച്ചിട്ടില്ലെന്ന് പബ്ലിഷർമാരായ ‘പെൻഗ്വിൻ ബുക്ക്സ്’ വ്യക്തമാക്കിയതോടെ, പകർപ്പ് ചോർന്നതിന് പിന്നിൽ ഗൂഢാലോചനയുണ്ടെന്ന സംശയത്തിൽ ദില്ലി പോലീസ് അന്വേഷണം ആരംഭിച്ചു.
ചൈനീസ് കടന്നുകയറ്റ സമയത്ത് കേന്ദ്ര സർക്കാർ സൈന്യത്തിന് വ്യക്തമായ ഉത്തരവുകൾ നൽകിയില്ലെന്ന് നരവനെയുടെ പുസ്തകത്തിൽ പരാമർശമുണ്ടെന്നാരോപിച്ച് രാഹുൽ ഗാന്ധി ലോക്സഭയിൽ രംഗത്തെത്തിയിരുന്നു. പ്രകാശനം ചെയ്യാത്ത പുസ്തകത്തിന്റെ ഹാർഡ് കോപ്പി സഭയ്ക്കകത്തും പുറത്തും അദ്ദേഹം ഉയർത്തിക്കാട്ടി. എന്നാൽ, ഔദ്യോഗികമായി പുറത്തിറങ്ങാത്ത പുസ്തകത്തിലെ കാര്യങ്ങൾ സഭയിൽ ഉന്നയിക്കുന്നതിൽ നിന്ന് സർക്കാർ രാഹുലിനെ തടഞ്ഞു.
പുസ്തകം ഇതുവരെ വിപണിയിൽ എത്തിയിട്ടില്ലെന്നും പ്രസിദ്ധീകരണത്തിനായി വിട്ടുനൽകിയിട്ടില്ലെന്നും പെൻഗ്വിൻ ബുക്ക്സ് അറിയിച്ചു. പകർപ്പവകാശ ലംഘനം നടന്നിട്ടുണ്ടെങ്കിൽ കർശന നിയമനടപടി സ്വീകരിക്കുമെന്നും അവർ വ്യക്തമാക്കി. പുസ്തകത്തിന്റെ രഹസ്യപ്പകർപ്പ് എങ്ങനെ രാഹുൽ ഗാന്ധിക്ക് ലഭിച്ചു എന്നതിലാണ് ഇപ്പോൾ ദുരൂഹത തുടരുന്നത്. ദില്ലി പോലീസ് ഈ വിഷയത്തിൽ വിശദമായ അന്വേഷണം നടത്തും.
രാഹുൽ ഗാന്ധിയുടെ നീക്കത്തിനെതിരെ ബിജെപി അംഗം നിഷികാന്ത് ദുബെ രംഗത്തെത്തി. നെഹ്റു കുടുംബത്തിനെതിരെ ആരോപണങ്ങളുള്ള അഞ്ച് പുസ്തകങ്ങൾ സഭയിൽ ഉയർത്തിക്കാട്ടിയാണ് അദ്ദേഹം ഇതിന് തിരിച്ചടി നൽകിയത്. പുസ്തകം ചോർന്നത് ഗൗരവകരമായ സുരക്ഷാ വീഴ്ചയാണോ എന്നും പോലീസ് പരിശോധിക്കുന്നുണ്ട്.