കൊച്ചി : സംസ്ഥാന ചലച്ചിത്ര പുരസ്കാര ജേതാവും മലയാളം റാപ്പറുമായ വേടൻ വിവാഹിതനാകുന്നു. ഒരു പൊതുവേദിയിൽ വെച്ച് സിപിഎം സംസ്ഥാന സെക്രട്ടറി എം വി ഗോവിന്ദനാണ് ഇക്കാര്യം അറിയിച്ചത്. ഫെബ്രുവരി 24-ാം തീയതി തൃശൂരിൽ വെച്ച് വേടൻ വിവാഹിതനാകുമെന്ന് എം വി ഗോവിന്ദൻ അറിയിച്ചു. എഴുത്തുകാരി നവമിലതയാണ് വധു. തൃശൂർ സ്വദേശിനിയാണ് നവമി.
തൃശൂരിൽ വെച്ച് ചെറിയ ഒരു ചടങ്ങ് നടത്തി വിവാഹം രജിസ്റ്റർ ചെയ്യാനായിരുന്നു വേടൻ തീരുമാനിച്ചിരുന്നത്. എന്നാൽ എം വി ഗോവിന്ദൻ ഇക്കാര്യം പൊതുവേദിയിൽ വെച്ച് അറിയിച്ചതോടെ വേടൻ്റെ വിവാഹ വാർത്ത എല്ലാവരും അറിഞ്ഞു. വേടനും നവമിലതയും ഏറെ നാളായ പ്രണയത്തിലായിരുന്നു. തൻ്റെ മോണലോവ എന്ന ഗാനം നവമിയെ കുറിച്ചാണെന്ന് നേരത്തെ വേടൻ പറഞ്ഞിരുന്നു.
ഹിരൺദാസ് മുരളി എന്നാണ് വേടൻ്റെ യഥാർഥ പേര്. വോയിസ് ഓഫ് വോയിസ്ലെസ് എന്ന റാപ്പ് ഗാനത്തിലൂടെയാണ് വേടൻ കൂടുതൽ ശ്രദ്ധേയനാകുന്നത്. സ്വതന്ത്രസംഗീതത്തിലും പിന്നണി സംഗീതത്തിലും വേടൻ ഒരുപോലെ പ്രവർത്തിച്ചു വരുന്നു. മഞ്ഞുമ്മെൽ ബോയ്സ് എന്ന സിനിമയിലെ കുതന്ത്രം എന്ന ഗാനത്തിനാണ് കഴിഞ്ഞ വർഷം വേടന് സംസ്ഥാന ചലച്ചിത്ര പുരസ്കാരം ലഭിച്ചത്.