സംസ്ഥാനത്തെ ക്ഷീരകർഷകർക്കും ഉപഭോക്താക്കൾക്കും ഒരുപോലെ നിർണ്ണായകമായ തീരുമാനവുമായി സർക്കാർ. മിൽമ പാൽ വില വർധിപ്പിക്കാനുള്ള മിൽമയുടെ ശുപാർശയ്ക്ക് സർക്കാർ അംഗീകാരം നൽകി. ലിറ്ററിന് 4 രൂപ വീതം വർധിപ്പിക്കാനാണ് നിലവിൽ ധാരണയായിരിക്കുന്നത്. ഇത് സംബന്ധിച്ച ഔദ്യോഗിക പ്രഖ്യാപനം നാളെ ചേരുന്ന മിൽമ ഡയറക്ടർ ബോർഡ് യോഗത്തിന് ശേഷം ഉണ്ടാകും.
കാലിത്തീറ്റ വിലയിലുണ്ടായ വർധനവും ഉൽപ്പാദന ചെലവ് ഉയർന്നതും കണക്കിലെടുത്ത് പാൽ വില വർധിപ്പിക്കണമെന്ന് മിൽമ ദീർഘനാളായി സർക്കാരിനോട് ആവശ്യപ്പെട്ട് വരികയായിരുന്നു. ആറുമാസം മുമ്പ് തന്നെ ലിറ്ററിന് 4 മുതൽ 6 രൂപ വരെ കൂട്ടണമെന്ന് മിൽമ ഡയറക്ടർ ബോർഡ് തീരുമാനിച്ചിരുന്നു. ഈ ആവശ്യത്തിൽ വിശദമായ പരിശോധന നടത്തിയ ശേഷമാണ് വില വർധിപ്പിക്കാൻ സർക്കാർ ഇപ്പോൾ അനുമതി നൽകിയിരിക്കുന്നത്.
വില വർധന നടപ്പിലാക്കുന്ന തീയതിയും കൃത്യമായ തുകയും നിശ്ചയിക്കുന്നതിനായി മിൽമ ഡയറക്ടർ ബോർഡ് അംഗങ്ങളുടെ നിർണ്ണായക യോഗം നാളെ ചേരും. ലിറ്ററിന് 4 രൂപ എന്ന വർധനവിനാണ് സർക്കാർ പ്രാഥമിക അനുമതി നൽകിയിട്ടുള്ളതെങ്കിലും, വർധിപ്പിക്കുന്ന തുകയുടെ എത്ര ശതമാനം കർഷകർക്ക് ലഭിക്കണമെന്ന കാര്യത്തിലും നാളത്തെ യോഗത്തിൽ തീരുമാനമുണ്ടാകും.