ന്യൂഡല്ഹി: ഇന്ധന വിലവര്ധനയില് പ്രതിഷേധിച്ചു തിങ്കളാഴ്ച നടത്തുന്ന ഹര്ത്താലിനു മാറ്റമില്ലെന്നു കെപിസിസി പ്രസിഡന്റ് എം.എം. ഹസന്. രാവിലെ ആറുമുതല് വൈകിട്ട് ആറുവരെയായിരിക്കും ഹര്ത്താല്. കേരളത്തെ ഒഴിവാക്കുന്നില്ലെങ്കിലും പ്രളയബാധിത പ്രദേശങ്ങളിലെ ജനങ്ങളെ ബുദ്ധിമുട്ടിക്കില്ല. താന് ഹര്ത്താലിനെതിരെ സമരം ചെയ്തിട്ടില്ല. നിയന്ത്രിക്കണമെന്നാണു നിലപാടെന്നും ഹസന് പറഞ്ഞു. നേരത്തെ രാവിലെ ഒന്പതു മുതല് മൂന്നുവരെ ഭാരത് ബന്ദ് നടത്തുന്നതിനാണു തീരുമാനിച്ചിരുന്നത്.
എല്ഡിഎഫും തിങ്കളാഴ്ച ഹര്ത്താലിന് ആഹ്വാനം ചെയ്തിട്ടുണ്ട്. ദേശീയതലത്തില് രാവിലെ ആറു മുതല് വൈകിട്ട് ആറു വരെ ഹര്ത്താല് നടത്താന് സിപിഎമ്മും സിപിഐയും തീരുമാനിച്ചു. മുഴുവന് ഇടതുകക്ഷികളും സഹകരിക്കും. ദുരിതാശ്വാസ വാഹനങ്ങളെയും ടൂറിസം മേഖലയെയും ഒഴിവാക്കുമെന്ന് എളമരം കരീം എംപി പറഞ്ഞു.
വാഹനങ്ങള് തടയില്ലെന്നും പെട്രോള് പമ്പുകള് കേന്ദ്രീകരിച്ചു പ്രതിഷേധ പ്രകടനങ്ങളും ധര്ണകളും സംഘടിപ്പിക്കുമെന്നുമാണു കോണ്ഗ്രസ് നേരത്തെ അറിയിച്ചിരുന്നു. ബിഎസ്പി ഒഴികെയുള്ള പ്രതിപക്ഷ കക്ഷികളെല്ലാം ബന്ദിനു പിന്തുണ അറിയിച്ചതായി കോണ്ഗ്രസ് വൃത്തങ്ങള് വ്യക്തമാക്കി.