ദുബായ്: യു.എ.ഇയിൽ സ്പാ (മസാജ് സെന്റർ) കേന്ദ്രങ്ങളുടെ മറവിൽ വൻതോതിൽ ലഹരിമരുന്ന് വിൽപന നടത്തിവന്ന സംഘത്തെ ദുബായ് പൊലീസ് പിടികൂടി. കേസിൽ മലയാളികളടക്കം ഇരുപത്തഞ്ചോളം യുവതികളാണ് അറസ്റ്റിലായി ജയിൽശിക്ഷയ്ക്ക് വിധിക്കപ്പെട്ടിരിക്കുന്നത്. സന്ദർശക വിസയിലെത്തി കബളിപ്പിക്കപ്പെട്ടവരും, സാഹചര്യങ്ങളുടെ സമ്മർദ്ദം മൂലവും അറിഞ്ഞുകൊണ്ടും ഈ ലഹരിവലയിൽ വീണവരുമാണ് ശിക്ഷിക്കപ്പെട്ടവരിൽ ഭൂരിഭാഗവും.
യുവതികൾക്ക് പുറമെ, പൊലീസ് റെയ്ഡ് നടത്തുന്ന സമയത്ത് ഈ കേന്ദ്രങ്ങളിലുണ്ടായിരുന്ന മലയാളികൾ അടക്കമുള്ള ഉപഭോക്താക്കളും (Customers) കേന്ദ്രം നടത്തിപ്പുകാരും കേസിൽ കുടുങ്ങിയിട്ടുണ്ട്.
കസ്റ്റമേഴ്സ് കുടുങ്ങിയത് മെഡിക്കൽ പരിശോധനയിൽ
റെയ്ഡ് സമയത്ത് സ്പായിൽ ഉണ്ടായിരുന്ന കസ്റ്റമേഴ്സിനെ പൊലീസ് മെഡിക്കൽ പരിശോധനയ്ക്ക് വിധേയമാക്കിയപ്പോഴാണ് ലഹരിമരുന്നിന്റെ അംശം ശരീരത്തിൽ കണ്ടെത്തിയത്. ഇതോടെയാണ് ഇവരും പ്രതിപ്പട്ടികയിലായത്. അതേസമയം, കേന്ദ്രത്തിന്റെ പ്രധാന നടത്തിപ്പുകാർക്കെതിരെയുള്ള വിചാരണ കോടതിയിൽ പുരോഗമിക്കുകയാണ്. ഇവർക്കെതിരെയുള്ള കുറ്റം തെളിഞ്ഞാൽ വൻ ശിക്ഷയായിരിക്കും ദുബായ് കോടതി വിധിക്കുക.
പ്രതികളിൽ ഭൂരിഭാഗവും മലയാളികൾ; കനത്ത പിഴയും നാടുകടത്തലും
തൃശൂർ, കോഴിക്കോട്, എറണാകുളം, ഇടുക്കി തുടങ്ങിയ കേരളത്തിലെ വിവിധ ജില്ലകളിൽ നിന്നുള്ള യുവതികളാണ് പ്രതികളിൽ ഏറെയും ഉള്ളത്. ഇവർക്ക് പുറമെ ഇന്ത്യയിലെ മറ്റ് സംസ്ഥാനങ്ങളിൽ നിന്നുള്ളവരും നേപ്പാൾ, ഫിലിപ്പീൻസ്, ശ്രീലങ്ക, പാക്കിസ്ഥാൻ സ്വദേശിനികളും ഈ സംഘത്തിലുണ്ട്.
കുറ്റക്കാരെന്ന് കണ്ടെത്തിയ യുവതികൾക്ക് ആറ് മാസം തടവും 20,000 ദിർഹം (നാലര ലക്ഷത്തോളം ഇന്ത്യൻ രൂപ) വീതം പിഴയുമാണ് കോടതി വിധിച്ചിരിക്കുന്നത്. തടവ് കാലാവധി പൂർത്തിയാക്കിയ ശേഷം ഇവരെ യു.എ.ഇയിൽ നിന്ന് നാടുകടത്തും. എന്നാൽ കനത്ത പിഴയൊടുക്കാൻ സാധിക്കാത്തവർ പിഴത്തുകയ്ക്ക് പകരമായി കൂടുതൽ കാലം ജാമ്യമില്ലാ തടവ് അനുഭവിക്കേണ്ടി വരും.
വിദേശങ്ങളിൽ ജോലിക്കായി പോകുന്നവർ സ്ഥാപനങ്ങളുടെ വിശ്വാസ്യത ഉറപ്പുവരുത്തണമെന്ന മുന്നറിയിപ്പാണ് ഈ സംഭവം നൽകുന്നത്.