ബാഴ്സലോണ: ഫുട്ബോള് ലോകകപ്പ് ഫൈനലിന്റെ കിക്കോഫിന് ഇനി മണിക്കൂറുകള് മാത്രമാണ് അവശേഷിക്കുന്നത്. കിരീടം കാക്കാനിറങ്ങുന്ന ലയണല് മെസ്സിയുടെ അര്ജന്റീനയും യൂറോ ചാമ്പ്യന്മാരായ സ്പെയിനും തമ്മിലാണ് പോരാട്ടം. അടുത്ത നാല് വര്ഷം ആരായിരിക്കും ഫുട്ബോളിന്റെ ചക്രവര്ത്തിമാര് എന്നറിയാനുള്ള ആവേശത്തിനിടയിലും ലയണല് മെസ്സി എന്ന അത്ഭുത മനുഷ്യനാണ് ഈ ലോകകപ്പിലേയും ചര്ച്ചാ വിഷയം.
ലയണല് മെസ്സിക്കെതിരെ പ്രത്യേക തന്ത്രങ്ങളൊന്നും പ്രയോഗിക്കാന് ഉദ്ദേശിക്കുന്നില്ലെന്ന് സ്പാനിഷ് പരിശീലകന് നേരത്തെ തന്നെ വ്യക്തമാക്കിയിരുന്നു. ഇപ്പോഴിതാ സ്പെയിന് ടീമിന് കലാശപ്പോരിന് മുമ്പ് ഉപദേശം നല്കുകയാണ് ഇതിഹാസ താരം ആന്ദ്രേസ് ഇനിയേസ്റ്റ. 2010ല് സ്പെയിന് ജേതാക്കളായ ലോകകപ്പില് ഗോള് നേടിയ താരമാണ് അദ്ദേഹം. ബാഴ്സലോണ എഫ്.സിയില് ലയണല് മെസ്സിയുടെ ആത്മമിത്രവുമാണ് അദ്ദേഹം.
ഫൈനല് മത്സരത്തില് മെസ്സിയെ നിലയ്ക്ക് നിര്ത്താന് ശ്രമിച്ച് വെറുതേ സമയവും ഊര്ജ്ജവും കളയരുത് എന്നാണ് ഇനിയേസ്റ്റ സ്പാനിഷ് താരങ്ങള്ക്ക് നല്കുന്ന ഉപദേശം. ‘മെസ്സിയെ കളിയില് നിന്ന് പൂര്ണമായി തടയുക എന്നത് അസാദ്ധ്യമാണ്. അതിനേക്കാള് സ്പെയിന് തങ്ങളുടെ ശൈലിയില് എങ്ങനെ അര്ജന്റീനയെ സമ്മര്ദത്തിലാക്കുന്നു എന്നതിലാണ് കാര്യം. അവസരങ്ങള് സൃഷ്ടിക്കുകയും അവ കൃത്യമായി ഫിനിഷ് ചെയ്യുകയുമാണ് വേണ്ടത്. മെസ്സിയുടെ നിശ്ചയദാര്ഢ്യത്തേയും കളിയിലെ സ്വാധീനത്തേയും കുറിച്ച് സംസാരിക്കാന് വാക്കുകളില്ല. ഓരോ മത്സരത്തിലേയും മെസ്സിയുടെ മികവിനെ നമ്മള് ബഹുമാനിക്കേണ്ടതുണ്ട്.’-ഇനിയേസ്റ്റ പറഞ്ഞു.