ബൈക്ക് പ്രേമികളുടെ ഇഷ്ടവാഹനമായ അപ്രീലിയ ടുവോനോ 457-ന്റെ പുതിയ സ്പെഷ്യൽ എഡിഷൻ ഇന്ത്യൻ വിപണിയിൽ എത്തി. നിലവിലുണ്ടായിരുന്ന സ്റ്റാൻഡേർഡ് പതിപ്പിന് പകരമായാണ് ഈ സ്പെഷ്യൽ എഡിഷൻ കമ്പനി അവതരിപ്പിച്ചിരിക്കുന്നത്. ഇതോടെ രാജ്യത്ത് ഇനി വിൽപ്പനയ്ക്കുള്ള ഏക പതിപ്പും ഇതുതന്നെയായിരിക്കും. റൈഡിംഗ് കംഫർട്ടിലും സസ്പെൻഷൻ ട്യൂണിങ്ങിലും ഉൾപ്പെടെ നിരവധി ശ്രദ്ധേയമായ പരിഷ്കാരങ്ങളോടെയാണ് ഈ വാഹനം എത്തിയിരിക്കുന്നത്.
ഡിസൈൻ തലത്തിലും പുതിയ മോഡലിൽ മാറ്റങ്ങൾ വരുത്തിയിട്ടുണ്ട്. പുതിയ ‘മാംബ ബ്ലാക്ക്’, ‘പൂമ ഗ്രേ’ എന്നീ ആകർഷകമായ നിറങ്ങൾക്കൊപ്പം പുതിയ ഗ്രാഫിക്സുകളും ഇതിൽ ഉൾപ്പെടുത്തിയിട്ടുണ്ട്. അധിക പാഡിംഗും പുതിയ പ്രൊഫൈലുമുള്ള സീറ്റ് നൽകിയതിലൂടെ റൈഡിംഗ് കൂടുതൽ സുഖകരമാക്കിയിരിക്കുന്നു. കൂടാതെ, സസ്പെൻഷൻ ട്യൂണിങ് കൂടുതൽ സോഫ്റ്റാക്കി മാറ്റിയതും, ഉയരമുള്ള ഹാൻഡിൽബാറും ചേരുമ്പോൾ മോശം റോഡുകളിലെ യാത്രയും ദീർഘദൂര യാത്രകളും മുൻ മോഡലിനേക്കാൾ ഏറെ ആയാസരഹിതമായിരിക്കുമെന്ന് ഉടമകൾക്ക് അനുഭവവേദ്യമാകും.
457cc പാരലൽ-ട്വിൻ എഞ്ചിൻ തന്നെയാണ് പുതിയ പതിപ്പിലും ഉപയോഗിച്ചിരിക്കുന്നത്. ഇത് 47.6hp കരുപ്പും 43.5Nm ടോർക്കും ഉത്പാദിപ്പിക്കുന്നു. 6-സ്പീഡ് ഗിയർബോക്സിന് പുറമെ റൈഡ്-ബൈ-വയർ, ട്രാക്ഷൻ കൺട്രോൾ, മൂന്ന് റൈഡിംഗ് മോഡുകൾ, 5 ഇഞ്ച് TFT ഡാഷ്ബോർഡ്, സ്മാർട്ട്ഫോൺ കണക്റ്റിവിറ്റി തുടങ്ങിയ ആധുനിക ഫീച്ചറുകളും ഇതിലുണ്ട്. അപ്രീലിയ ടുവോനോ 457 സ്പെഷ്യൽ എഡിഷന് 3.99 ലക്ഷം രൂപയാണ് എക്സ്-ഷോറൂം വില.