കണ്ണൂര്: പറശ്ശിനിക്കടവ് കൂട്ടബലാത്സംഗകേസിലെ പ്രതിയായ നിഖിൽ സി തളിയിലിന്റെ രാഷ്ട്രീയ ബന്ധങ്ങള് തെളിയിക്കുന്ന കൂടുതല് തെളിവുകള് പുറത്ത്. പെണ്കുട്ടിയെ പീഡിപ്പിച്ചവരെ അറസ്റ്റ് ചെയ്യണം എന്നാവശ്യപ്പെട്ട് ഡിവൈഎഫ്ഐ നടത്തിയ മാര്ച്ചില് നിഖില് പങ്കെടുക്കുന്നതിന്റെ ദൃശ്യങ്ങള് ആണ് ഇപ്പോൾ പുറത്തു വന്നിരിക്കുന്നത്.ഡിവൈഎഫ്ഐ യൂണിറ്റ് സെക്രട്ടറിയായ നിഖില് കേസില് അറസ്റ്റിലായതോടെ ഇയാള്ക്ക് പാര്ട്ടിയുമായി ബന്ധമില്ലെന്ന തരത്തില് പ്രചരണങ്ങള് ശക്തമായിരുന്നു. ഇവയുടെ മുനയൊടിക്കുന്നതാണ് ഇപ്പോള് പുറത്തു വരുന്ന ദൃശ്യങ്ങള്.
അഞ്ജന എന്ന പേരില് വ്യാജ പ്രൊഫൈല് ഉണ്ടാക്കി പെണ്കുട്ടിയുമായി അടുപ്പം ഉണ്ടാക്കിയ സംഘം അഞ്ജനയുടെ സഹോദരന് എന്ന പേരിലും പെണ്കുട്ടിയുമായി ബന്ധമുണ്ടാക്കുകയായിരുന്നു. പരിചയപ്പെട്ട ആളെ തേടി പെണ്കുട്ടി പറശ്ശിനിക്കടവില് എത്തിയപ്പോള് ലോഡ്ജില് എത്തിച്ച് കൂട്ട ബലാല്സംഗം ചെയ്യുകയായിരുന്നു
ലൈംഗിക പീഡനത്തിന്റെ ദൃശ്യങ്ങള് സംഘം വീഡിയോയില് പകര്ത്തിയതായി പൊലീസ് പറയുന്നു. വീഡിയോ ദൃശ്യങ്ങള് പ്രചരിപ്പിക്കുമെന്ന് പറഞ്ഞ് വീണ്ടും പെണ്കുട്ടിയെ ലോഡ്ജില് എത്തിക്കുകയും കൂട്ട ബലാത്സംഗത്തിന് ഇരയാക്കുകയും ചെയ്തു. പെണ്കുട്ടിയുടെ നഗ്ന ദൃശ്യങ്ങള് പ്രചരിപ്പിക്കുമെന്ന് പറഞ്ഞ് സഹോദരനെ ഭീഷണിപ്പെടുത്തി പണം ആവശ്യപ്പെടുകയും മര്ദ്ദിക്കുകയും ചെയ്തതോടെയാണ് സംഭവം പുറത്തറിയുന്നത്.