മാനന്തവാടി: ദുബൈയില് അന്തരിച്ച പ്രവാസി വ്യവസായി അറക്കല് ജോയിയുടെ മൃതദേഹം ജന്മനാട്ടിലെത്തിച്ച് സംസ്കരിച്ചു. മാനന്തവാടി രൂപതയുടെ കത്തീഡ്രല് ഇടവകയായ കണിയാരം സെന്റ് ജോസഫ് കത്തീഡ്രല് പള്ളി സെമിത്തേരിയിലായിരുന്നു സംസ്കാര ചടങ്ങുകള്.
പ്രത്യേക വിമാനത്തില് ദുബൈയില്നിന്നും ഇന്നലെ രാത്രി എട്ടോടെ കോഴിക്കോട് അന്താരാഷ്ട്ര വിമാനത്താവളത്തില് എത്തിച്ച മൃതദേഹം രാത്രി 12ഓടെ മാനന്തവാടിയില് ജോയിയുടെ വസതിയായ അറക്കല് പാലസില് എത്തിച്ചു. ജോയിയുടെ ഭാര്യ സെലിന്, മക്കളായ അരുണ് ജോയി, ആഷ്ലിന് ജോയ് എന്നിവരും മൃതദേഹത്തെ അനുഗമിച്ചിരുന്നു.
നേരത്തെ തയാറാക്കി പട്ടികയില് ഉള്പ്പെട്ട ജനപ്രതിനിധികളും ബന്ധുക്കളും സുഹൃത്തുക്കളും ഉള്പ്പെടെ 20 പേര് മാത്രമാണ് അന്തിമോപചാരം അര്പ്പിച്ചത്. ഏഴോടെ ഏതാനും വാഹനങ്ങളുടെ അകമ്ബടിയോടെ മൃതദേഹം വഹിച്ചുകൊണ്ടുള്ള ആംബുലന്സ് വിലാപയാത്ര ആരംഭിച്ചു. ഏഴരയോടെ പള്ളിയില് എത്തിച്ച മൃതദേഹം പ്രാര്ഥനകള്ക്ക് ശേഷം മാതാവിന്റെ കല്ലറയോട് ചേര്ന്നുള്ള കുടുംബ കല്ലറയില് സംസ്കരിച്ചു.