ഇടുക്കി; ജലനിരപ്പ് 136 അടി എത്തുന്ന ഘട്ടത്തില് മുല്ലപ്പെരിയാറിലെ ജലം ടണല് വഴി വൈഗൈ ഡാമിലേയ്ക്ക് കൊണ്ടുവരണമെന്നും പതുക്കെ പുറത്തേക്ക് ഒഴുക്കിവിടണമെന്നും കേരളം തമിഴ്നാടിനോട് ആവശ്യപ്പെട്ടു. ഇക്കാര്യം നടപ്പാക്കാന് ബന്ധപ്പെട്ട ഉദ്യോഗസ്ഥര്ക്ക് നിര്ദ്ദേശം നല്കണമെന്ന് സംസ്ഥാന ചീഫ് സെക്രട്ടറി ഡോ. വിശ്വാസ് മേത്ത തമിഴ്നാട് ചീഫ് സെക്രട്ടറി കെ. ഷണ്മുഖന് അയച്ച കത്തില് ആവശ്യപ്പെട്ടു. ഷട്ടറുകള് തുറക്കുന്നതിനു ചുരുങ്ങിയത് 24 മണിക്കൂര് മുമ്പ് കേരള സര്ക്കാരിനെ വിവരം അറിയിക്കണമെന്നും കത്തില് പറയുന്നു.
ഇടുക്കി ജില്ലയില് കനത്ത മഴ പെയ്യുന്ന സാഹചര്യമാണ് നിലവിലുള്ളത്. ഇതിനെത്തുടര്ന്ന് മുല്ലപ്പെരിയാര് റിസര്വോയറിന്റെ ക്യാച്ച്മെന്റ് ഏരിയയില് ജല നിരപ്പ് വളരെ വേഗത്തില് ഉയര്ന്നുകൊണ്ടിരിക്കുകയാണ്. ഓഗസ്റ്റ് മൂന്നിന് 116.20 അടി ഉണ്ടായിരുന്ന ജലനിരപ്പ് ഏഴാം തീയ്യതി ഉച്ചക്ക് 2 മണി ആയപ്പോഴേക്കും 131.25 അടി ആയി ഉയര്ന്നു.വരുന്ന രണ്ടു ദിവസങ്ങള് ജില്ലയില് റെഡ് അലര്ട്ട് പ്രഖ്യാപിച്ചിരിക്കുകയാണ്. മഴ കൂടുതല് ശക്തമാകുമെന്നാണ് കരുതുന്നത്. നിലവില് റിസര്വോയറിലേയ്ക്ക് വരുന്ന വെള്ളത്തിന്റെ അളവ് 13,257 ക്യൂസെക്സും, ടണല് വഴി പുറന്തള്ളുന്ന അളവ് 1,650 ക്യൂസെക്സും ആണ്.
2020-08-08