കോട്ടയം: പീഡനക്കേസില് പ്രതിയായ ജലന്ധര് ബിഷപ്പ് ഫ്രാങ്കോ മുളയ്ക്കല് രാജ്യം വിടുന്നത് തടയാന് വിമാനത്താവളങ്ങളില് ലുക്കൗട്ട് സര്ക്കുലര് നല്കി. ബിഷപ്പ് വത്തിക്കാനിലേക്ക് കടന്നേക്കുമെന്ന സൂചനയെ തുടര്ന്നാണ് പൊലീസ് നടപടിയെടുത്തത്. ജലന്ധര് രൂപതയുടെ കീഴിലുള്ള കണ്ണൂരിലെ രണ്ട് മഠങ്ങളിലും ഇന്ന് പരിശോധന നടത്തും. അതിന് ശേഷം അന്വേഷണ സംഘം ജലന്ധറിലേക്ക് തിരിക്കും. ബിഷപ്പിനെ അറസ്റ്റ് ചെയ്യാന് പഞ്ചാബ് പൊലീസിന്റെ സഹായം തേടും.
അതേസമയം ബിഷപ്പിന്റെ അറസ്റ്റ് ഉടനുണ്ടാകില്ലെന്നും മുഴുവന് തെളിവുകളും ശേഖരിച്ച ശേഷം അറസ്റ്റ് മതിയെന്നുമാണ് തീരുമാനം. ബിഷപ്പിന്റെ അറസ്റ്റുണ്ടായാല് ജലന്ധറില് ക്രമസമാധാന പ്രശ്നമുണ്ടാകുമെന്ന റിപ്പോര്ട്ട് പുറത്തുവന്നതിനെ തുടര്ന്നാണിത്. അതിനാല് ജലന്ധര് പൊലീസിന്റെ നിര്ദേശം കൂടി പരിഗണിച്ച ശേഷം മാത്രമേ അറസ്റ്റുണ്ടാകൂ.