കണ്ണൂർ: സുഹൃത്തിനെ ചുറ്റിക കൊണ്ട് തലയ്ക്കടിച്ച ശേഷം രക്ഷപ്പെടാൻ ശ്രമിച്ചയാൾ ട്രെയിനിടിച്ച് മരിച്ചു. കണ്ണൂർ പാപ്പിനിശ്ശേരിയിൽ രാവിലെ 10 മണിയോടെയാണ് സംഭവം. പാപ്പിനിശ്ശേരി സ്വദേശി പികെപി ഷെഫീഖ് (44) ആണ് മരിച്ചത്.
ചുറ്റിക കൊണ്ടുള്ള അടിയേറ്റ ഷെഫീഖിന്റെ സുഹൃത്ത് പ്രശാന്ത് ഗുരുതരാവസ്ഥയിലാണ്. രാവിലെ പ്രശാന്തിന്റെ വീട്ടിലെത്തിയ ഷെഫീഖ് കുടിക്കാൻ വെള്ളം ചോദിച്ചു. പ്രശാന്ത് വെള്ളമെടുക്കാൻ പോയപ്പോൾ പിന്നാലെയെത്തിയ ഷെഫീഖ് ചുറ്റിക കൊണ്ട് തലയ്ക്ക് അടിക്കുകയായിരുന്നെന്നാണ് വിവരം. തുടർന്ന് അവിടെനിന്ന് ഓടി രക്ഷപ്പെടുമ്പോഴാണ് പാപ്പിനിശ്ശേരി റെയിൽവേ സ്റ്റേഷന് അടുത്തുവച്ച് ഷെഫീഖിനെ ട്രെയിനിടിച്ചത്. പ്രശാന്തനെ ആക്രമിക്കാനുള്ള കാരണം വ്യക്തമായിട്ടില്ല. സംഭവത്തിൽ അന്വേഷണം ആരംഭിച്ചതായി പൊലീസ് പറഞ്ഞു.