സംസ്ഥാനത്തെ 38 തദ്ദേശവാർഡുകളിൽ ഇന്ന് ഉപതെരഞ്ഞെടുപ്പ് (Kerala Local Body By Election) നടക്കും. രാവിലെ ഏഴിനാണ് വോട്ടെടുപ്പ് ആരംഭിക്കുന്നത്. വാർഡ് അംഗങ്ങൾ എംഎൽഎമാരായി തെരഞ്ഞെടുക്കപ്പെട്ടതോടെയാണ് ഇവിടങ്ങളിൽ ഉപതിരഞ്ഞെടുപ്പ് നടത്താൻ തീരുമാനമായത്. യുഡിഎഫ് സർക്കാർ അധികാരത്തിൽ എത്തിയ ശേഷം മൂന്ന് മുന്നണികളും തമ്മിലുളള ആദ്യ രാഷ്ട്രീയ പോരാട്ടത്തിനാണ് കേരളം സാക്ഷ്യം വഹിക്കാൻ പോകുന്നത്. എറണാകുളം, കോഴിക്കോട് എന്നിവിടങ്ങളിലെ രണ്ടു കോർപറേഷൻ വാർഡുകളുൾപ്പെടെ 38 തദ്ദേശ വാർഡുകളിലേക്കാണ് വോട്ടെടുപ്പ് നടക്കുക.
തൃശൂർ, പാലക്കാട്, കണ്ണൂർ ജില്ലകളിലെ മൂന്ന് നഗരസഭാ വാർഡുകളിലും തിരുവനന്തപുരം , കോട്ടയം, പാലക്കാട് ജില്ലകളിലെ മൂന്ന് ജില്ലാ പഞ്ചായത്ത് ഡിവിഷനിലും ഉപതിരഞ്ഞെടുപ്പ് നടക്കും. ഏഴ് ബ്ലോക്ക് പഞ്ചായത്തുകളിലും 23 ഗ്രാമ പഞ്ചായത്ത് വാർഡുകളിലും വൻ പോരാട്ടമാണ് നടക്കാൻ പോകുന്നത്. എട്ടുവാർഡുകളിലെ അംഗങ്ങൾ എംഎൽഎമാരായതോടെയാണ് ഉപതെരഞ്ഞെടുപ്പ് നടത്തേണ്ടി വന്നത്. സുധീർഷാ പാലോട്, ദീപക് ജോയിസ ഫാത്തിമ തെഹ്ലിലിയ, സി വി ശാന്തകുമാർ, വിനു ജോബ്, ടി എം ശശി, സുമേഷ് അച്യുതൻ, ഉഷാ വിജയൻ എന്നിവരാണ് എംഎൽഎയായി തെരഞ്ഞെടുക്കപ്പെട്ടത്.
നിലവിലെ കണക്കനുസരിച്ച് , മത്സരം നടക്കുന്ന തദ്ദേശ വാർഡുകളിൽ യുഡിഎഫിനാണ് മേധാവിത്വം. 22 എണ്ണം യുഡിഎഫിന്റെ സിറ്റിംഗ് വാർഡുകളാണ്. 15 എണ്ണം എൽഡിഎഫിനൊപ്പവും. എറണാകുളം ജില്ലയിലെ പൂതൃക്ക പഞ്ചായത്തിൽ ട്വൻ്റി20 അംഗം രാജി വെച്ചതിനെ തുടർന്നുള്ള ഉപതിരഞ്ഞെടുപ്പാണ് നടക്കുന്നത്. കോൺഗ്രസ് സർക്കാർ അധികാരത്തിൽ വന്നശേഷമുളള ആദ്യ രാഷ്ട്രീയ പോരാട്ടമായതിനാൽ കേരളം വളരെ ആവേശത്തോടെയും ഗൗരവത്തോടെയുമാണ് തിരഞ്ഞെടുപ്പിനെ ഉറ്റുനോക്കുന്നത്. പ്രാദേശിക വിഷയങ്ങൾക്ക് അപ്പുറം പവർകട്ട് ഉൾപ്പെടെയുള്ള വിഷയങ്ങളും പ്രചാരണത്തിൽ ശക്തമായി മറ്റ് പാർട്ടികൾ ചർച്ച ചെയ്തിരുന്നു.
ഭരണത്തിലേറി മാസങ്ങൾ പിന്നിടുമ്പോൾ ജനങ്ങളുടെ പ്രിയം ഇടിഞ്ഞിട്ടില്ലെന്ന് തെളിയിക്കേണ്ടത് ഭരണപക്ഷത്തിനും യുഡിഎഫിനും അനിവാര്യമാണ്. അതേസമയം, നിയമസഭാ തിരഞ്ഞെടുപ്പ് തിരിച്ചടിയിൽ നിന്ന് കരകയറാൻ ശ്രമിക്കുന്ന എൽഡിഎഫിനും സാന്നിധ്യം ഉറപ്പിക്കാൻ ശ്രമിക്കുന്ന എൻഡിഎയ്ക്കും ഈ തിരഞ്ഞെടുപ്പ് വളരെ നിർണ്ണായകമാണ്. പ്രിയദർശിനി പദ്ധതി അടക്കമുള്ള ജനക്ഷേമ പദ്ധതികളും ഭരണനേട്ടങ്ങളും മുൻനിർത്തിയാണ് യുഡിഎഫ് വോട്ടഭ്യർത്ഥിച്ചത്.
നിയമസഭാ തിരഞ്ഞെടുപ്പിലെ തോൽവിക്ക് ശേഷം തിരിച്ചുവരവിന് കാത്തിരിക്കുന്ന എൽഡിഎഫിന് വൻ ആത്മവിശ്വാസം നൽകുന്ന സുവർണ്ണ അവസരമാണിത്. മുഖ്യമന്ത്രിയുടെ വിമാനയാത്രയും സംസ്ഥാനത്തെ വൈദ്യുതി നിയന്ത്രണവും വിവാദ വിഷയങ്ങളാക്കിയാണ് പ്രചാരണ നടത്തിയത്. സീറ്റെണ്ണം കൂട്ടാനായാൽ മുന്നണിയിൽ അത് വലിയ നേട്ടമാകും. തദ്ദേശ വാർഡുകളിൽ തികഞ്ഞ ആത്മവിശ്വാസത്തോടെയാണ് എൻഡിഎ രംഗത്തുള്ളത്. സർക്കാരിനെതിരെ ഉയർന്ന ഭരണവിരുദ്ധ വികാരവും വികസന വിഷയങ്ങളും ഉയർത്തിക്കാട്ടി പ്രിൻസിപ്പൽ പോരാട്ടത്തിലേക്ക് കടക്കാനാണ് ബിജെപി നേതൃത്വം നൽകുന്ന എൻഡിഎ ശ്രമിക്കുന്നത്.