കൊച്ചി: ഓണക്കാലത്തെ തിരക്കിന് പരിഹാരവുമായി കൊച്ചി മെട്രോ. യാത്രക്കാരുടെ തിരക്ക് വർധിക്കുന്നതിനനുസരിച്ച് അധിക സർവീസ് നടത്തുമെന്ന് കൊച്ചി മെട്രോ അറിയിച്ചു. ഓണം അടുത്തതോടെ കൊച്ചിയിൽ വലിയ തിരക്കാണ് അനുഭവപ്പെടുന്നത്. പ്രധാന റോഡുകളിലെല്ലാം ട്രാഫിക് ബ്ലോക്കും കൂടി. ഈ സാഹചര്യത്തിൽ അധിക സർവീസ് നടത്തുന്നത് യാത്രക്കാർക്ക് വലിയ ആശ്വാസമാകും.
ഓഗസ്റ്റ് 22, 24, 25 തീയതികളിലാണ് അധിക സർവ്വീസ്. ഉച്ച കഴിഞ്ഞ് 3 മണി മുതൽ തിരക്കുള്ള സമയങ്ങളിൽ 6 മിനുട്ട് 45 സെക്കൻഡ് ഇടവേളയിൽ നാല് അധിക സർവീസുകൾ നടത്തും. ഓഗസ്റ്റ് 23 ഞായറാഴ്ച്ച രണ്ട് ട്രെയിനുകൾ കൂടുലായി സർവീസ് നടത്തും. ഉച്ച കഴിഞ്ഞ് 2.30 മുതൽ 7 മിനുട്ട് 13 സെക്കൻഡ് ഇടവേളയിൽ 8 അധിക ട്രിപ്പുകളാണ് ഞായറാഴ്ച ഉണ്ടാകുക. ഈ ദിവസങ്ങളിൽ ആവശ്യമെങ്കിൽ ഉപയോഗിക്കാൻ ഒരു ട്രെയിൻ കൂടി സജ്ജമായിരിക്കുമെന്നും കെ എം ആർ എൽ അധികൃതർ അറിയിച്ചു.
ഇടപ്പള്ളി – കുണ്ടന്നൂർ ബൈപാസ്, ഇടപ്പള്ളി, വൈറ്റില, സഹോദരൻ അയ്യപ്പൻ റോഡ്, ഫോർഷോർ റോഡ്, ഷൺമുഖം റോഡ്, ബാനർജി റോഡ് എന്നിവടങ്ങളിലെല്ലാം തിരക്കേറി തുടങ്ങിയിട്ടുണ്ട്. വൈകുന്നേരങ്ങളിലാണ് തിരക്ക് കൂടുതൽ. അതേസമയം, മെട്രോ രണ്ടാംഘട്ട നിർമാണ പ്രവർത്തനങ്ങളുടെ ഭാഗമായുള്ള നിർമാണ പ്രവർത്തനങ്ങളടക്കം പുരോഗമിക്കുന്നതും തിരക്കിനെ ബാധിക്കുന്നുണ്ടെന്ന വിമർശനവും ഉയരുന്നുണ്ട്.